早幾日同幾位朋友去咗上海，參觀咗幾間工廠，其中一間係一間香港公司叫「力勁」嘅 GIGA PRESS工廠，可能大家未必有聽過佢個名但其實如果無依間公司，就唔會有今日嘅 TESLA，原因係十幾年前 Elon Musk 想做第一架 TESLA Model S 時候，佢想用一個「一體壓鑄」技術去做底盤，由金屬一體成型去做，而非當時主流細件細件組裝而成，但當時所有人覺得 Elon Musk 係傻佬，依個「一體壓鑄」底盤係無可能做到，只有依間香港公司「力勁」劉老闆幫佢做，而最後當然做咗出來，TESLA 改變咗成個汽車行業，而慢慢依個技術亦都漸漸流行。
朋友 Jason 好快手剪咗條片，中間到尾有啲參觀感想，有興趣可以睇下： https://www.youtube.com/watch?v=uK8A7YlcB4Q
其實以前曾經不少前輩同我講，做嘢不能常常只係埋頭做，要有時出去行開下先得，會比到自己新嘅啟發，可能有啲問題你一直死諗諗諗，想解決，但係咁樣係無法解決的，原因係可能個解決方法係「完全唔需要解決依個問題」。講開 Elon Musk 就用 Elon Musk 做例子，佢常常講 the best part is no part、most smart engineerers spend time optimising a part that should not exist，依啲就係咁嘅意思。有時係本身個方向係行錯咗，所以先會有咁多問題出現，然後就會好頭痛，如果去行另一個正確嘅方向，可能依啲問題係不存在的。喺過去大半年可能大家都睇到我寫嘅週記會見到其實我都好頭痛去解決一啲「營運上」嘅問題。當然依啲問題都是係需要學習同解決但或許個重點同attention未必係需要放依度，做好其他更重要嘅事情之後，可能個問題就會自動解決。依個係我今個星期嘅得著，亦係我近半年最大嘅得著。
#183 必須要行得正以及有一個正的心（07/12/2025）