做咗床品一段時間，開始慢慢對於床品嘅基礎有啲掌握，但最近我抽查產品時，卻覺得有一啲細節位，睇車線係做得唔太夠靚。當然，遇到依啲情況肯定第一時間係覺得負責車嘅同事車得唔靚，手工差啲，於是我亦都立即去同負責管理出品嘅同事講，大佬，咁你都出到出嚟，咁都得？然後，我亦都當日下午再抽查多啲產品，作一個更詳盡嘅抽檢，但我亦明白一樣嘢係，因為要去話人，發洩脾氣和不滿係可以，亦都係常人可以理解到的，但係如果咁落去，只流於情緒發洩，其實同事除咗話我會下次小心啲唯唯諾諾之外，其實佢都好難可以改善得到。呢個係我呢幾年學得到的，原來做好件事係需要從個根源入手，有時可能假設真的係一個同事佢沒有條理，比較甩漏得多，或者假設車衣姐姐手工唔好，那麼就要再從嗰個 Process 中，睇吓能否做到任何 Process Re-engineering，去改變嗰個流程或者做事嘅方法，令到一啲唔想見到嘅失誤係*不可能*係呢個制度入邊發生，我重申，係要 aim for 「不可能」，我發現呢句嘢先係原來對於一間公司生死存亡同埋能否做得好係最重要。盡可能令到任何人行埋去，即使可能佢能力係比較差啲嘅都會做得好，咁就最好了。又或者係初步開始嘅時候，首先要睇睇有冇啲任何嘅 factor，會令到更大機會出了問題。
我亦都必須承認喺我開始嘅時候，我有時都太過流於發洩自己不滿的情緒，以及「叫佢做好啲」，而並非去從佢嘅角度去諗如何可以「幫佢做好啲」，直到近一兩年，先慢慢學會咗，原來我係需要從佢嘅角度，諗辦法幫佢做好佢嘅工作。
例如好似今次呢個嘅細節位車線問題，最終我係發現其中一個很大的成因，很有可能係源於車縫使用嘅線的品質問題，其實我哋做這些紡織品買線返嚟做車縫，真係估唔到佢哋都會出問題，呢個原來係嗰個線公司啲出品差咗，毛線的品質唔好令到我哋好仔細睇嘅時候，發現條線有時粗時幼，尤其係幼嘅位置，喺車縫的時候很容易斷線，容易斷線的唔好處就係要返工重新再做，就會要接駁斷線，然後就不好看，以及因為佢嘅毛線品質唔好，亦會令到車出嚟嘅線唔好睇，有機會有鬆有緊。但客人會見到嘅就係「車得唔靚」、「手工差」！依下就好委屈了。但係我係責無旁貸，係我嘅責任去解決 。
#210 人生不需要做好多正確決定（14/06/2026）