最近因需要改善產品質素，和一個已經交往了一段時間，由我開始做 Re Pillow 無耐（大約 2021年）已開始有恆常合作的商業夥伴斷絕了一個頗大的生意來往。本來，其實過去三年，我們是每月也有和她有頗多來往的。當然做了這麼長時間大家亦繼續有合作，一定是因為她亦一直有做到我們想要的各樣，亦都大家合作得來，想法和目標接近，也是一個老實、可信的人。但是，其實過去幾年，亦不能不否認是有一些我們遇到的問題，實在她亦無法解決得到，當然這些問題亦不會是極大而不能接受的，而她亦絕對不是沒有努力過或者大家沒有想過如何解決問題，否則我們亦都一早已斷絕了來往或者已尋找其他人去協助，但不得不承認是確實情況不是最理想的。我知道好似近幾個月講咗好多「雅芳婷」，我亦都發現我好似搞到我和佢拍拖咁？日日都講住提住，但無可否認雅芳婷近半年進入咗我嘅世界，改變咗我 Re Pillow 入面好多嘢...... 佢哋嘅出現係解決了我好多本身自己解決唔到嘅問題，亦都有啲本來我想做嘅嘢但因為現實資金同環境嘅問題做唔到嘅，依家有機會可以做到。對於我依個好想做一啲新事物，但又奈何規模同錢唔夠嘅人嚟講，係好大好大幫助。honestly, 係一個大事情嚟。其實甚至可能比 Disney 上年搵我哋合作機會仲大，因為 雅芳婷係一個同行嘅公司，同 industry，同為香港 market，佢願意有合作，係有好多喺做紡織，做床品依個行業入面遇到嘅問題，我解決唔到，但因為佢已經遇過，解決過，行過依條路，係可以令我行少咗好多冤枉路。
講講下講遠咗，講返依個有恆常合作的商業夥伴，其實因為佢一直解決唔到嘅問題，雅芳婷可以解決得到，當然，有時講事情亦都會講感情，如此離開某程度上係都係對佢係一個打擊，因此亦都真係再問問佢是否解決唔到，大家開心見誠傾，但最後確實係解決唔到，亦都其實依啲問題亦不是第一日有同埋出現，最終，我哋都係走到一個結束。亦都咁講，結束一部份的合作亦不是完全每個月無任何合作，但只是少咗一個大部份咁，轉去了雅芳婷的情況...... 在此，都願所有人安好。
好似寫寫下感覺好似講分手咁，但無可否認始終我最後最後，我需要為嘅唔係自己，唔係雅芳婷，亦都唔係邊個合作夥伴負責任。我去到最後，我需要為所有客人負責任，因為我要做好個產品，客人用得好，用得滿意，喺各方面包括產品本身，耐用度，款式，購買體驗，網站流暢度，售後服務，性價比，質素，等等等等，我都要做得好，咁先會有未來。如果做事我自己諗自己，諗想邊個partner，邊個同事開心，而啲嘢做出嚟係唔得，即使你同事，你partner覺得你好好都好，佢日日讚你都好，最終件事唔會長遠。
我始終認為，去到最後，是要為客人負責。做好自己，解決問題。
#215 品質和內部系統改進、未能好好分配上下半年（19/07/2026）