#060 一本400多頁的書對 Re Pillow Co. 啟發（23/07/2023）

歡迎嚟到本週週記，今個星期我終於完成咗 After Steve by Tripp Mickle 呢一本四百幾頁嘅書。我認我曾經都係一個好沉迷 Steve Jobs 以及 Apple 嘅人，因此呢本書雖然厚，以及裏面有好多關於 Apple 的歷史，當中管理層嘅不同人物之間嘅事，可能有啲人都會覺得好悶，但係閱讀過程中，我都樂在其中。

呢本書係講 Apple 嘅創辦人之一 Steve Jobs 離世之後，蘋果公司嘅繼續發展，中間到底公司嘅不同人發生咗啲咩事。佢哋點樣可以喺冇咗呢個靈魂人物之後，繼續去行出自己嘅一條路，甚至令到蘋果可以營業額更加屢創新高。而當中嘅核心團隊喺冇咗 Steve Jobs 之後，到底佢哋係點樣工作，公司嘅路線有冇咩轉變等。咁點解會睇呢本書，呢本書同 Re Pillow Co. 有咩關係？人地堂堂 Trillion Dollar Company，而我哋只係香港蚊型 start up。關係其實係有的：我覺得道理其實係貫通，都能夠應用喺我哋度，只不過人哋係玩一個銀碼倍大好多嘅遊戲。我其實中學時已鍾意了解其他公司商業故事，其他人可能覺得悶但我覺得好有趣，你睇，全世界咁多商店，點解一啲係街角車仔麵有啲會成為譚仔，我並唔係認為生意做得大就代表好，完全唔係，只係我覺得當中佢哋做咗啲咩、無做啲咩、當中嘅分別係會形成日後好大嘅分別，了解當中分別同思考係有趣。而且學習前輩行錯過嘅路，自己就唔好花時間再錯一次，人生時間有限，而整個人類族群能向前，係因為我哋能夠從前人經驗學習，喺佢哋建立嘅基礎上繼續行，時間夠就交比下一代。所以對我嚟講，睇書、同前輩學習唔單止為重要更係必須。或許人類好易有一個感覺覺得自己個「情況唔同」「今時唔同往日」，當然亦唔係錯，每個時代都有自己特點，但好多道理同規律其實亦喺歷史上不斷重複。謙虛學習，保持對所有事物有開放態度。我雖然甚麼都不是，但都希望可以學習多啲，讓 Re Pillow Co. 做得更好。

Designed by Apple in California

既然講開 Apple，就講講 Apple 設計對我嘅影響。我欣賞 Apple （以往）對設計同科技融合嘅執著。科技公司從來較為側重功能，可能亦與公司多為男性主導有關，由 IBM 到 COMPAQ 或依家較多人認識嘅 ThinkPad，其實都係 function over form（功能凌駕設計），設計笨笨重重但實用，唯獨係 Apple 將設計納入考慮因素，而且設計唔係只係外觀，而係關乎於本身內裏整件產品如何運作（how it works），有好多經過思考聰明設計，而做到 form follows function。我覺得係值得欣賞，至少以往係咁。喺 Re Pillow Co. 設計上，我亦好執著於做到「purposeful design」（有意義的設計），亦即每一個設計細節係有原因，因為我覺得呢啲設計會係經得起時間考驗。

如何令營業額更穩定

書入面提到 Apple 過去十年做咗嘅事亦都好值得一提，佢哋將本來收入結構基本上絕大部份來自產品，改成做到不只於此，可以有其他服務收入，例如 iCloud 網上儲存服務、Apple Music 音樂服務、Apple Card 信用卡、Apple TV+ 網上影視節目平台等，因為呢啲多數係月費嘅重複收入（recurring revenue），令收入大量增加同更穩定。以往 Apple 要靠做一件受歡迎產品才可增長，如果產品不受歡迎，可能會大失預算，例如 iPhone 6s 及 Apple Watch 就係比較不受歡迎，喺公司角度「We are one bad product away from failing」，壓力既大，財政上亦好難穩定。呢個位當我睇到其實感覺同自己情況好接近，如果新產品不受歡迎，咁就玩完！Yeah！呢個亦係我在思考嘅事，亦有一些初步諗法，要再準備下，喺合適時候就可以推出。對於未來，務實為重，先做好產品，了解自己資源上嘅限制，唔好太過好高騖遠，按自己能力慢慢行，先可以行得遠。

By the way，今個星期整咗件 T-shirt 比公司，係一個碌碌下嘅 Re logo，跌跌撞撞但又好似好調皮咁，其實係喻意人生做事豈有一帆風順，都係跌撞中成長，最緊要 have fun doing it，輕鬆啲面對人生起起伏伏就好。