最近呢個星期工作比較忙，但亦有好多思考 。今個星期初嘅時候有一港大師妹嚟我公司訪問，講自己關於創業嘅里程同埋方向，訪問只係做咗一兩個小時，及後佢離去之後當晚我亦都有好多思考，諗返之前嘅一啲自己開初做 Re Pillow 嘅日子 。當時我對呢件事並無抱有任何期望，亦都沒有任何壓力，可以隨心所欲創作同埋去規劃所有事情 。想做就即刻去做，亦都唔需要顧慮太多，因為有一句講得好啱：Nothjng to lose（我沒有任何可以失去）
Re Pillow 只係我一個諗出嚟嘅idea，隨便去做，冇打算佢會成功，更加冇打算要賺錢：賣到就賣、賣唔到就算，就係咁樣 。
過去一段長時間，我諗都有幾年了，開始感覺自己多了顧慮 —— 客人會點睇？同事做唔做得來？執行上有冇困難？財政上有冇壓力？如此種種，慢慢一層一層加喺自己嘅膊頭上 —— 於是乎做每一個決定開始多了壓力，唔再係可以隨心所欲 。我雖然仍是一個普通的年輕人，也沒有什麼錢，但考慮、顧慮多了的，無法再完全自由不負責任咁去做決定，因為我唔出糧，我同事都要出糧 。
某程度上呢個壓力，其實確實令到產品出品係更加好，亦都各種商業決定考慮得更仔細，成件事係做得更好，減少甩漏和出錯 。但同時間，個人好大壓力 。發夢諗住工作，工作非常困身，好多時喺工作嘅時候，壓力積累到爆發 。我覺得呢個階段不能夠長期落去，因為身邊嘅人都察覺到我開始不論係心理或者個人健康上面都開始有啲頂唔順 。我都feel到但係我唔想俾人睇死…… 我相信香港嘅年輕人唔可以好似外界其他人咁睇低，我要證明俾其他人睇我哋做到，而得把口講係冇用，一定要要做出來 。
但或者喺心態上，今個星期嘅依個一訪問，提醒咗我開頭當時幾咁冇壓力去做，心態上確實我都可以調整，可以放鬆自己啲，試吓更加可以不理外界，更加做自己，壓力可以減少，或者咁樣成績出嚟會更好 。
#146 BEYOND（23/03/2025）