#059 Just be me（16/07/2023）

歡迎來到本週週記！又要我同大家分享一下今個星期嘅事。

今個星期其實主要都係做緊一啲年底會出嘅產品，因為上次吸收下天氣嘅教訓唔可以搞到太遲先出，如果依家唔加緊進度做嚟緊12月31號之前要推出嘅產品，咁嗰啲產品呢就要等到下年年初先會推出，若然沒有季節性嘅產品就由自可，但係如果係例如冬天嘅厚被、保暖產品等等，咁就會好大件事。

早到大概十月都已經可能有啲人會購買厚被，所以就要依家準備了。

不過今個星期主要其實比較多係自己嘅反思，今個星期見到上面嘅嗰張圖其實係我每個星期都會做嘅excel表cap出嚟。by the way 其實呢啲算唔算係機密？不過我諗都冇人會睇我嘅週記， 既然講得係週記我遮住咗啲數字，純粹分享我會做呢一件事都應該可以嘅。因為我好想真真正正咁分享我嘅工作同埋我面對緊嘅比大家知。

喺過去一年，我每個星期都要做一個 weekly review，會計算返過去一個星期嘅收入同埋支出睇下個情況如何。當然呢樣嘢係教識咗我如何計數，因為以往我係從來都唔係太有呢類嘅概念，係一件好事。但同時佢畀咗壓力我，尤其可能當事情唔係咁理想嘅時候，其實嗰個星期未計都知道嗰個情況會係點，令到我都好唔願意同埋有怕咗佢，去到一個地步我覺得我自己做呢件事好大壓力好似苦多過樂。睇返過去一年前嘅自己，好似真係依家冇咁識點樣去開心放鬆。

不過睇重大局而言，我知道呢個係需要嘅，若然要好好營運一盤生意，自己必須要對數字敏感，而我亦都自己學識要從容面對啲嘢，可以開心地 just be me，識計數之餘亦都能夠享受個過程，當然講就容易，不過我會向住呢個目標進發，希望幾個月之後大家都會見到更加開朗嘅我。