#061 探訪各地合作夥伴（30/07/2023）

歡迎來到本週週記！又由我同大家分享本週工作。今個星期我繼續都喺中國各地與部份國內/外國合作夥伴見面，過來在國內南北四處工幹其實都已近兩星期，開始有啲想念香港。可能有啲人會諗噢外國合作夥伴？點解唔係去外國而係去中國？因為外國公司一般進入東亞市場都會喺國內設分公司/代理，而整個大中華（包中港台）或甚至亞洲都係由呢個 Office 去管，或許以前呢個角色係由香港做，但現時確實都未必係了，總部都係中國內地，無他，同佢哋言談傾過，畢竟香港市場確係太細，而且地理位置上唔太方便，因而喺佢哋大型企業考慮而言，都係設喺國內較好。

其實有留意開週記嘅你，或許都發現我近幾個月常外出工幹，在國內亦同來自唔同文化背景、國家嘅人傾談，確實有感世界真係好大，而且亦都好似了解多咗整過世界嘅運作模式，例如各國商業公司點樣交易，透過貿易各自所需，呢類交易成本、流程等又係點，而不同國家主要大致嘅角色定位又係點，感覺對於了解自己位處嘅位置有咩優勢同短處了解亦都多咗，呢個我覺得對於自己思考時亦係好有幫助的。

另，我感覺到其實亦有唔少人希望 Re Pillow Co. 可以成功，有時我會收到 email 嘅支持同鼓勵，其實每一字一句都對我好緊要。坦白講，我對個人功名利祿睇得好輕，但我希望自己可以為市場帶嚟一啲新風氣，我希望可以推動發展令所有人受益。我明白可能有啲人會唔信，會話「所有商人都係咁講啦，最後還是為賺錢」，我明白的，但或許如果我係為賺錢嘅話，其實我真係無需做床上用品呢啲好樸實嘅生意，外面好多搵錢嘅方法，做呢啲產品肯定唔係最賺錢嘅。咩都好啦，我信一切由市場決定，如果我做得唔好就執咗佢，但執之前我想我試試，再難我都要盡力做。我覺得若然抱住一般嘅心態去做，好可能做唔掂，所以真係好搏盡去做，咁樣周圍走嚟走去，想我哋有日可真係同外國人話：「香港出咗個 Re Bedding（Re Pillow Co. 新名（暫名））」

這兩星期頻頻撲撲，身心俱疲，加上休息不多，也沒有機會運動，其實狀態麻麻，就此擱筆。