#003（19/6/2022）

若然你要我喺今個星期工作上搵一啲課堂/經驗比你，我會話係：「萬事一開頭可應有好多枝節做唔好，唔緊要，先專心做好最重要件事，之後再慢慢執返好啲細節。」今個星期我主要工作就係執返好啲「細節」。

網站左下角加入「Chat Box」，讓客人更容易查詢

我們在網站左下角添加咗一個 Chat Box 對話框，客人可以喺對話框Click啲常見問題，即時可以睇到答案。另外客人亦可喺唔洗離開網站，直接留低聯絡方式，喺對話框向我哋查詢，我哋同事會盡快於工作與工作之間的時間回覆返客人。暫時以我哋嘅人手同規模未能夠做到「Live Chat 即時對話」，但呢個方法可以方便客人直接留低聯絡方式查詢，唔洗又開Email/WhatsApp/FB/IG，應該都可以方便到唔少人。其實好耐好耐以前係有呢個對話框的，當時一日可能得幾十人睇下個網站，我自己應付到，只係因為隨住多咗人了解，令我太忙碌於日常運作所以先關掉咗，直至現時我哋開始慢慢可以多一兩個同事幫手先開返。其實呢個網站查詢對話框我認為係必須要有的，但實在以往一直我自己一個人做哂所有嘢，我嘅首要任務每日係出貨同做日常運作，發展產品等等，所以以前無法做到再於FB/IG/EMAIL上再加個客戶查詢方式，但依家我諗我哋可以試試了。

電腦貨存系統

係，可能講都無人信，我哋到呢家先有一個真正電腦庫存系統。今個星期三開始，我哋正式實行電腦貨存系統（除咗沙田一田因為唔係自己舖）。因為有電腦系統，我們可以檢查貨存，更加方便日常運作。以前，我哋係要用 WhatsApp 同紙筆，寫低賣咗幾多，寄出幾多，生產咗幾多、仲有幾多貨嗰啲，變咗日常好忙亂同好易有錯漏。依家開始有電腦系統紀錄，應該至少可以似返一個 proper 啲嘅舖頭…… 點解唔早啲做？好多原因，但當中最大嘅原因係以前我開始時無諗過會需要系統，又無咩資金（我哋一直無 funding 同 sponsor），因此網站系統只係簡單買賣，唔可以做埋貨存，去到需要用時，已經好遲，好難轉了，但最近都「的」起心肝做咗佢，為未來做好準備。

環保包裝

我哋最近喺度將產品包裝一樣一樣卜人轉緊用環保啲嘅代替，當中首先要做嘅係唔同產品嘅包裝盒，我哋希望包裝可以更加細（減少運輸碳排放），亦希望物料更環保，今個星期我哋收到一啲早前向紙盒廠訂落嘅訂製環保盒sample，效果不錯，但有啲位可以再改善，希望可盡早實行。另外包裝內嘅其他配件（膠袋、紙卡等）我哋都聯絡緊供應商提供資料同埋報價，希望可以係唔太增加成本要轉嫁消費者嘅情況下，轉用更環保嘅代替品。

工作時間愈來愈長，但係係好開心的

 以前以為，2022年6月，當我考哂試，畢咗業之後（即係依家），可以多啲時間做枕頭嘢，因為係自己嘅嘢，可以自訂返放工時間，可以想抖就抖，應該會多啲時間，唔會又讀書又做嘢咁辛苦，但當然確實唔再需要讀書令我多咗好多時間，可以專心做枕頭一件事，唔洗再好似以前「耍雜技」咁嘗試平衡哂所有嘢，唔好令其中一樣掉落地，但其實自己工時係非常長，一有時間就做嘢，不過都係開心嘅其實，我真係好幸福可以有呢種每日都係做自己鍾意做嘅嘢嘅生活。我知道並非必然。

產品研發

今個星期我們亦都喺度做進行新產品研發，下年可以面世。我個人認為，以上嘅網站查詢、貨存系統又或者環保包裝等等其實都係較為次要，最重要是產品真係好用，真係一個優質嘅產品。但係抱歉我冇辦法喺度同大家分享，因為最近我哋都發現自己嘅產品有部份嘅設計做法已經俾人哋抄襲。有啲設計係我哋獨有，係我自己諗出嚟，之前從來都冇見過市面上其他產品係有嘅，但係呢佢哋就抄咗我哋，而且仲唔會講話係參考我哋，credit都唔比。開頭嘅時候確實係有啲嬲，因為當時我設計嘅時候根本冇錢申請專利，亦都冇諗過可能需要。而家我都睇開咗，或者呢個都係一件好事，證明自己做嘅嘢係啱。但係咩都好啦，無論點都好我哋都係要繼續做好自己，唔好理咁多。我相信做好產品，始終所有人都會睇到。

好啦今個星期就寫到呢度，希望大家都保持身體健康，心情開朗。唔好擔心太多（我同大家都要學吓…）！一齊加油！