#004（26/6/2022）

今個星期想公開下 Re Pillow Co. 嘅總部！

寫週記，其實就係想分享下我哋背後工作日常事，比大家可以參與其中，所以今個星期就一於開始時講下我哋嘅 Office（我稱為：Re Pillow Co. HQ）。

就係咁了⬇️

因為實在太尷尬，點解 Re Pillow Co.，作為一間 Internet Company（至少我認為係），會用緊咁舊嘅電腦，而且兩個人 Share 一張細枱？係... 就係咁。但呢張細小嘅枱，就係孕育我哋 Re Pillow Co. 嘅地方。（我哋最近亦會換咗個Mon佢，呢兩個都係別人唔要嘅舊Mon，太細難工作）

我同我朋友阿 Ben（佢之前亦於 MM YouTube 訪問我們時亦有露面：https://www.youtube.com/watch?v=GG1rZYCmqGQ）就係每日喺呢度工作的。呢張枱嘅另一面就係枕頭製作工場，好多訪問都有拍過，在此不重複介紹。

雖然地方好細，但係卻好開心，我哋每日都在此工作。

話說今個星期我哋相約一間大型公司，談論之後合作嘅事，因為要睇我哋未來產品一些物料實物，所以佢哋來臨我哋 Office 開會。真係好尷尬。佢哋兩個人來，一入到嚟，嘩，Office咁細嘅，因為成個 Office 就係咁大，我同阿 Ben 比咗我哋兩個位（上圖電腦前）佢哋坐（我哋係嗰啲圓凳，無得挨，因為慳位），我同 Ben 就企喺佢哋後面，大家就係咁，兩個人坐，兩個人企，開會。

希望之後會好啲，會有個 Decent 嘅地方同外面人開會，比人上嚟都有位坐。但專心做好自己先。

今個星期最大嘅進步就係我哋終於有公司電郵了！我哋現時新聯絡電郵係 support@repillow.co ，唔再係 repillowco@gmail.com。之前一直都係 @gmail.com，收到亦有唔少客人提過唔專業，所以今星期開始轉用新 email，舊 email 會繼續檢查，慢慢轉去新度。新電郵：support@repillow.co

早前於另一 Blog Post 提到想做到唔斷貨（https://repillow.co/blogs/news/5-6-近況更新），想做到：Always In Stock 。為此，我哋本星期做咗兩件事。

1. 安排每週定期補貨：我們今星期開始，不論是否貨量不足，都會每週定期落零售點補貨。

等我解釋下：以往我哋做法係收到門市消息話剩返可能 10-20% 貨量，當刻先「臨急臨忙」即刻安排開車落去補貨，咁嘅做法好處係靈活，但有可能會收到消息時，同時忙緊第啲嘢（例如做緊枕頭、包裝出緊網上單），令到唔可以即刻補到，又或者喺新一批送到時，零售點已經賣哂了，因此中間有斷貨，令人買唔到。

為咗解決呢樣問題，我哋決定每星期都會補，就好似為電話叉電咁，以前我哋去到10% 20%先會叉電，依家就唔理，定期即使見到佢5-60%呢都照叉電，希望等佢長期維持於80%-100%，以備不時之需，唔好要用嗰時先冇電。

2. 為咗令到客人更加易掌握供應情況，唔好白行一趟，我哋亦都於網站添加咗一個新嘅頁面：https://repillow.co/pages/stock 有即時最新嘅供應情況更新，裏面包括各樣產品喺唔同嘅零售地點嘅供應情況，相信應該幫到大家。

今個星期就寫到呢度。最後附上我自己喺搭巴士時工作的圖片。近幾個星期都只瞓得4-5個鐘（好ironic，做枕頭，但係自己卻享受唔到），其實真係好攰，而且工作基本上係隨時隨地都要做，但係係開心。我常相信一句：「Rest at the end, not in the middle. 」祝大家未來都有一個開心嘅星期！

P.S. 最近發現自己變得非常緊張每一個細節。其他人都覺得我迫得自己太緊。我唔想比人感覺我哋會退步，唔想有人會對於產品/服務有一點點嘅唔滿意，想所有嘢都可以盡善盡美。但要做到真係好難，好似總有啲位置會發現問題，總有啲突發情況出現。

感覺自己比起以前無咁易開心咗，好似經常諗住做得唔好嘅地方，收到別人嘅讚美亦都無以前咁開心一整日了。

一切由入原料到製作到品質監控到網站設計客戶服務日常運作出貨速遞到客人收到枕頭，當 Re Pillow Co. 規模開始成長時，我覺得要管理所有嘢好難。比起其他大公司，我哋規模係蚊型，但對我嚟講，現時規模我覺得已經開始慢慢超乎我可控制到嘅規模，有時我感到力不從心。但 Rest at the end, not in the middle.，繼續努力，一切都會值得。