今個星期嘅大事就係我哋嘅Crisis（我哋內部比佢嘅名稱），我發現有一批枕頭質感同以往唔一樣（補充一下整件事始末及我們的處理方案，參見以下2條link（先睇圖、後睇片）：https://www.facebook.com/repillowco/photos/a.235558974929557/547965530355565/ https://fb.watch/e9eM9oSNkq/ ）呢篇週記主要想講當時嘅故事。
我係一個好普通嘅香港年輕人。讀大學期間，做枕頭一事係我嘅個人自發做嘅 Passion Project，係我自己想做嘅事，因為收到愈來愈多客人認同，因而我更努力去做。幾個月前，我就快畢業，其實畢業後嘅工作早於一年前簽好約，但我唔常因為要畢業而放棄信任自己嘅每一位客人。因此，今年5月中考完所有試之後，我去同咗嗰間公司傾咗請辭（中間嘅糾結又係另一故事），全心投入做好 Re Pillow Co.。我信我如果將我所有心神同努力都放哂落去，我哋雖然未必可以成為下一間跨國床品企業，但可以做到一間真心嘅公司。
因此，當我遇到呢個Crisis時，嗰下真係驚。係，即管我平日甚少會驚一啲事情，今次真係驚。我哋想成長，成為香港一間值得大家自豪嘅品牌，但發生呢一件事，即使只係影響部份客人，對嗰啲受影響嘅客人對我哋信任都會有好大打擊。
我喺公開解決方案之前，計算過如果喺最差情況下（即係受影響人數遠超預期），如果要將所有牽涉嘅枕頭全部換過一批新，包運費寄到上門/順豐站補償，牽涉嘅銀碼有幾多。銀碼我唔能夠講（因為太多同行想知，佢哋成日描住我哋做啲陰招）。好大壓力。嗰刻我諗我知點解出面其他床品公司從來唔做呢啲。更何況，我哋都無收到投訴，點解要做？更何況，出面公司收到投訴都唔會咁樣全批做，最多一個人投訴就換比一個人，唔會主動去email所有人講件事同去想主動補償的。但嗰一刻我諗：我做枕頭，為咗咩。就係因為出面其他公司永遠都唔會咁着重個顧客體驗，就係因為佢哋收咗錢就走咗。 出邊嘅公司用廣告騙取咗我哋嘅信任，然之後走咗去。太多太多，各行各業都有呢啲例子，我自己都中過好多伏，我唔認為咁樣係正確。如果，我個補償方案，真係要令我失去所有，Let it be。
因為我兩手空空咁樣嚟做枕頭，其實都可以兩手空空咁樣走。之後再努力返，唔知成功定失敗，但至少我對得住信任我哋嘅每一位，至少我冇辜負佢哋。
所以我叫同事 draft 咗個 email，然之後send晒俾有可能受影響嘅人，再出返post， 之後嘅嘢大家睇我哋嘅 Facebook/IG post（文初 link）已經知道，咁就唔再講。
做咗呢個決定之後，其實我自己好釋懷。或者呢啲就係叫做「財散人安樂」。
我想補充一點：我好年輕，我慢慢發現好多人可能覺得好少錢，係細數，對我已經係好多錢，係我全部，希望你明白。
公司同事有一句「潮語」，話 Re Pillow Co. 其實唔係做生意，係專開「善堂」。
Ermm... 唉我都唔知講咩好。
咁開「善堂」嘅 Effect 係呢一個星期，公司財政、個人壓力，同埋工作量都達到有史以來嘅巔峰。好似連續不斷通宵，長期繃緊嘅感覺，直頭連放鬆都唔可能，冇時間都只係一個原因，最重要係根本心理上你冇辦法放鬆，因為你知道好多好多事情要逐一處理所有嘢都根本頂唔順。我哋嘅覆電郵同事頂唔順，我哋嘅枕頭製作頂唔順，我哋財政上頂唔順，我哋仲要兼顧日常正常營運，該方面都頂唔順。仲有負責即日要回覆一啲即時訊息嘅同事都頂唔順。
慶幸身邊有朋友同事一齊支撐同埋幫忙，雖然唔係好多人，但心中知道有人一齊行，其實為我幫輕咗好多。 雖然週記本身原意唔係打算寫自己個人感受，但係真係想講，好多謝身邊出現每一位。因為正正有佢哋，先有今日嘅 Re Pillow Co.。好多路都係孤獨，係需要自己行，但知道有人都支持你嘅決定，即使無咩實際嘢幫到，係喺呢條孤獨嘅路上，會感覺好好多。
想多謝每一位幫助過嘅你哋，你哋嘅 Facebook/ IG Comment, Message, Email 嘅支持，我到呢一刻都唔知會唔會頂得住，但你嘅信任對我好重要，我一定唔會辜負，呢個係我信嘅價值。
呢啲咁嘅週記，睇緊嘅你都係癲癲哋嘅。
下週再見！
#005（3/7/2022）
#007（17/07/2022）