#005（3/7/2022）
全面使用可再生能源、進一步品質管理、分期付款計劃、PayMe、太古城體驗館新價錢牌、包裝內全新儲棉袋、新Mon... 又一星期了，歡迎大家閱讀我哋最新的 Re Pillow Co. 週記！
今個星期繼續係忙碌嘅星期，去到星期六又差唔多全日打風，以致我哋嘅計劃都打亂哂（因為我們本來星期六打算返廠有文件處理）。但唔講咁多，立即開始我哋 Re Pillow Co. 週記，講講本週Updates：
#1 全面使用可再生能源
最近我哋向中電申請參與佢哋嘅可再生能源證書計劃，亦於6月29日（剛剛過去星期三）完成批核。現時我哋香港所有嘅廠房同埋辦公室（其實都係得葵涌一到）都已經全面使用可再生能源。呢個係繼種樹計劃以後另一環保計劃，未來亦會有其他環保計劃。例如在實行當中嘅環保包裝計劃，應該可於未來數月內實行。
了解我們 100% 可再生能源計劃：https://repillow.co/blogs/news/我們的辦公室及廠房均已全面使用可再生能源
#2 進一步品質管理
由於我們自己枕頭製作涉及好多人手工序，以往可能會出現有如同手工藝品，有差異情況，另外亦會受原材料質素浮動影響，從而有損枕頭質感。呢一個問題係我哋有留意到，而且亦是令我個人非常頭痛嘅問題。小問題嘅可能係枕頭尺寸長咗0.5-1CM，最嚴重嘅，可能會對質感有影響。雖然牽涉嘅百分比以我所知好細，應該不足幾%，但係對於我嚟講，係好大好大嘅CRISIS。因為呢一班受影響嘅客人，可能永遠都唔會知究竟 Re Pillow 係實際係點，佢哋可能會覺得我哋產品好一般甚至好差好差。甚至可能對我哋失哂信心。唉。It hurts me when I think about this because I am so emotionally connected to the brand and our customers。我知聽落好 cliche 但真心的，因為買得呢個枕頭都係相信我嘅人，我唔想令佢哋失望。過去一年我哋亦將我哋工序愈來愈「量化」，即係將好多本來靠經驗嘅做法，變成實際可以量度嘅數字，令所有做法可以更有系統同標準，最近2星期亦將有啲工序再拆細量化，避免會有人為出錯，令到品質不一。而且我哋亦都開始做一個每月抽檢，每個月都會喺每項產品抽一件出來驗，睇下同再前一個月同再之前嘅有冇分別。另外，關於入原料方面，我哋亦已開始同全球最權威檢驗公司 SGS 商討，幫我哋檢驗原料質素，確保物料一定係一直達到最高水平，唔可以會有一時一樣。我哋亦都會請佢再為我哋定期在市面抽查我們自己產品去檢驗，等我哋唔只有內部抽查，亦有外部檢查，品質更穩定。我認為如果RPC要做得更好，去再提升上一個Level，呢個係必要。關於 SGS: https://www.sgs.com/en
我有時會自己同自己講以下呢句：I will do whatever it takes to make Re Pillow Co. a well-known and trusted brand that we can all be proud of. Might fail, but I will do my best. Whatever it takes. Whatever challenges ahead, bring it on, try me.
#3 分期付款計劃
我們與 Atome 合作，推行分期付款方案。之前收到有少部分客人問可唔可以用 Atome 分期比，因此我哋亦都於過去幾星期同咗 Atome 商議。客人可以透過 Atome 平台，分三期免息付款，每期會相隔一個月。Atome 可以喺網上用，亦可以喺我哋嘅門市度用都得，一樣都會係免息分期。合約已經簽好，而網站亦於星期六（2/7）晚上加入了 Atome 分期付款，現在只剩門市。我們已經約了 Atome 公司同事來門市安裝，但仍未得到他們答覆確實日子，但相信未來幾星期可以做到門市 Atome 分期付款。
#4 PayMe 付款
一直以來，我哋都想可以有 PayMe 付款，但以前一直做唔到因為公司沒有 HSBC 戶口。我哋今個星期正向 HSBC 申通開設公司戶口，希望可喺未來網上同門市都可盡快加入 PayMe 付款方式。
#5 太古城新價錢牌
講起都好笑，開初我哋嘅太古城體驗館開舖時其實係無價錢牌的，因為我哋第一次開舖，無諗過原來漏咗價錢牌。後來就好簡單咁打印咗價錢紙仔，但因為無過膠亦都無嘢保護，好快爛哂，之後就轉咗做手寫，最近我哋有位同事好有心，主動整咗啲靚啲，有打印，有膠牌嘅價錢牌放在太古城嘅門市，我覺得成件事即刻專業咗好多。可以睇睇以下圖片：
#6 包裝內全新儲棉袋
我哋下個月左右開始會轉用新嘅「儲棉袋」。「儲棉袋」係我哋隨每一個枕頭，包裝內附送嘅袋，係比客人調整枕頭高度後，用嚟存放多出來嘅棉的。以往我哋係用一種磨砂密實膠袋，後來因為客人意見認為唔夠大，因此我哋就訂咗一批大啲嘅同款袋。再後來亦都有客人反映個膠袋唔夠耐用，個膠拉鍊會喺長期使用後拉爛，個邊位亦都可能會爛，因此我哋已決定轉用另一款更耐用嘅袋去比客人儲棉之用。但由於現時仲有一啲密實袋未用完，相信要到下月（8月）中後期先全面完成轉接。
#7 新Mon！
我哋換咗新 Mon！一齊嚟睇下先啦：
真係好開心嘅，因為個Mon大咗，處理啲單嘅時候可以一次過show到成list，方便咗。呢個可以話係本週最大嘅 Update。（PS：如果想睇下我哋之前個Mon，可以睇返上星期 #004 嗰篇週記）
總結
好，今個星期就寫到呢度，下星期再見。多謝你閱讀我寫嘅週記。唔知你呢個星期過得如何，但我哋都一樣陪你，我哋雖然未必可以面對面傾計，可能我哋素未謀面，但我哋都係同你一樣，一齊努力緊的，加油。
