#010（07/08/2022）

又到咗每週一次嘅週記時間！本週又有啲咩分享下呢？

本週有件事要交代，就係關於速遞公司的。我哋一直想多啲支持唔同嘅公司同埋試試各速遞公司服務，因此我哋亦都一直有將部份訂單分發去唔同速遞公司去寄出，並非全部都係用一間市面上某間獨大嘅速遞公司去派，亦都當係支持下其他小公司。但奈何用過一段時間其他公司，實在有各式問題，例如送貨冇交帶，應承咗嘅送貨日期做唔到，司機有時候唔知去咗邊，各式各樣嘅問題令到客人非常困擾，迫使我哋冇辦法再繼續使用。因此由下星期開始，我們會暫時全面轉用順豐速遞及 Kerry Express 寄出產品。

今個星期有件得意嘅新鮮事，就係我哋有一個客人話佢分享比朋友知話最近買咗我哋個枕頭，然後佢話佢令到有十幾個自己朋友都買咗我哋個枕頭...... 呢個都確實係破紀錄了。其實我哋耐不久都會收到客人話買完再買比/推薦身邊嘅人（多數係家人或情人），但之前真係無遇過話可以令到十幾個人買咁誇張。真係實在多謝呢位客人。

講開講，其實我哋呢個小小嘅 Re Pillow Co. 一直都係要靠呢啲口碑去宣傳開去的。係，我哋其實比起市面上所有大家講得出嘅牌子都要細，而且仲要細好多。規模細最大嘅問題係，我哋無佢哋有嘅資源去做宣傳，變相比較難可以短時間令到品牌得到多啲知名度。只能慢慢咁努力慢慢做。

講起宣傳，我哋其實間中都會收到唔同 Marketing 公司話可以幫忙做廣告、幫忙宣傳。可能係幫我哋請旗下嘅 KOL、Micro-influencer 等，又有各式唔同渠道可以幫我哋落廣告云云。可惜嘅係我哋真係無呢個額外錢做呢啲。有錢嘅，我想做返好我哋本業先，去改進，去努力做好個產品。我明。如果同一畢錢可能拎去呢啲公司做宣傳更加能夠搵到錢，好可能會係真。但係我唔想嘛。我覺得咁樣啲錢唔係「用得其所」，唔係真係為到件事好。我想真正做好枕頭，唔係想做好賺錢。即使佢免費比服務我都唔好意思啦，人哋都有家庭，都要食飯。我無錢我都唔好意思要受人哋服務。他日我比唔返佢，又或者比嘅錢其實佢覺得不足夠，我都係唔好意思。我寧可自己努力啲，做到真係可以請得起嘅時候，先再請吧。

可以順便講埋其實真心係好感恩，因為呢一年來，我哋得到好幾個傳媒採訪，令我哋有少少人識咁。如果唔係我哋可能更加無人識，無人理，好似一個人獨自喺個井度大嗌，但從來地面上嘅人都聽唔到，好孤獨，好難捱。我明白，因為我試過。

Re Pillow Co. 首一年都係咁的，無人理，無人識，我自己同自己玩，整到個網站好靚，再整個網站譯哂英文，都無人理。

咁都係講一個信字，信自己會做到，一定有日會做到。係，只能夠係咁。當然，過程只有你自己一個，而且身邊嘅人唔會明白你，佢哋睇唔到你睇到嘅嗰條路同大概未來會係咁，所以出於愛，佢哋會擔心你得唔得，其實都係為你好的。因為我唔其實太叻點樣同人溝通，有時好難同人表達我諗啲咩，所以我只能自己默默地去做，亦都開始試下寫下嘢落嚟，好似呢啲週記咁，希望訓練自己表達能力。

今個星期週記確實比較特別，寫嘅 style 又同平時唔同。

講返啲 update 啦：依個星期我哋加咗 PayMe 喺網上同門市，可以比多個方法大家付款。PayMe 我個人都常用，所以都希望方便到人。另外新包裝（更環保嘅包裝）亦都即將會登場，依家等緊送嚟。Re Pillow 即將會有第三個版本嘅包裝了。另外我哋呢個星期都喺度諗緊點樣可以更穩定供應，有好幾個方案都在研究緊，畢竟我哋啲製作好似做手工咁，要穩定供應係有啲難度，但係實在如果做到，會好好多… 無人想要買嘅時候，哎，無貨。

好，今星期就此擱筆。