今個星期有件趣事真係ok好笑的，但講之前想講返啲本週 Update
#1 產品研發及合作
新產品研發及合作有大突破！我哋有一新產品係一直在研發過程中，大概做咗大半年了，現時當中牽涉到多個國家、多間公司同機構等，要聯絡哂咁多方，再傾到一個大家都要接受嘅方案，本身已經唔容易。我個人覺得當加上大家都親眼無見過面（防疫外遊政策令商務旅遊變得困難），會有啲影響。始終 online communication 會對建立信任有限制。親身到訪過對方公司會好好多。公司內部嘅會議用 video online call 例如 Zoom、MS Teams 取代可能更快捷方便，但商務上如果大家都素未謀面，好講信任，要合作同處理風險問題就會好難。
現時有一個 project 有牽涉呢個情況，其實已經有啲位置膠着咗幾個月，我每次諗起都頭痛，但最近我諗到個方法可以透過大家一人行一步，繞過咗某一個大家都唔想負擔某個風險問題，今個星期五對方更加已經同意咗，因此大家可以去行落下一步。我真係好開心！
至於產品係咩，大家可以期待下 hahahaha～
#2 同事打邊爐
今個星期我哋幾位 Re Pillow Co. 同事一齊放工去咗打邊爐！呢個其實係其中一位同事嘅 idea，佢話我哋應該一齊每個月搞啲活動聯誼下，增進同事感情。因此今個星期我哋首次做呢件事，一齊夜晚打邊爐。係幾開心嘅！有時大家工作都會累了，一齊聚下會好啲。下個月打算一齊去打保齡球！
#3 到學校分享
上星期五我有幸獲何文田聖公會蔡功譜中學邀請，同中四五同學講下關於自己少少讀書以及創業嘅心得。坦白講，我其實讀書以及從商都唔叻，係「摸住石頭過河」，每一日都係學習緊。好開心當日同學都好積極，無全程瞓哂覺，Q&A環節亦問到答唔哂。
當日講咗好多唔同嘅話題，例如分享我準備公開考試時點樣讀書以及管理時間嘅方法，以及點樣喺讀書同時去做自己想做嘅事。我諗如果要總結嘅可以講係：多啲讀書，多啲自學，有開放嘗試同願意學習嘅心同喺最壞嘅情況都唔好放棄。無論做咩都好，盡自己能力做，可能未必即時會有成效，甚至可能要努力好耐好耐先睇到啲改善，但係都一定會有見到成績嘅一日的。
藉此亦再次感謝學校老師邀請，多謝學校比機會我喺學生面前班門弄斧，分享少少經驗。希望當日講座幫到各位同學，最重要係祝各位同學學業進步，嚟緊 DSE 奪取佳績，加油！
P.S. 早前我收到一位老師轉達，其中一位席間嘅同學想親自感謝我，唔好客氣喇！老師亦都同我提過你嘅夢想，加油！希望你可以盡早實現佢！
#4 新門市地點及籌備
今個星期我們亦在準備緊未來嘅新門市地點。係，我哋有打算喺現時太古城以外加多一個地點比大家體驗產品同即時購買現貨。間中我哋都收到客人話：「下… 得太古城一度可以睇哂啲產品同埋去試，太遠喇，地點太唔方便了…！希望可以多啲門市。」我哋係收到的。當然，之所以無開多啲門市係因為成本問題，而我哋其實營運只係僅僅OK的，規模細以及初起步，要開舖，每月開支要計算好清楚。但依家都仲係了解同研究階段，希望開得成吧！
#5 觀塘 APM 一田 Roadshow Pop Up
嚟緊10月，我哋會同一田百貨合作，喺佢哋觀塘 APM 嘅超市外面商場位置進行期間限定嘅 Re Pillow Co. 推廣活動。呢個係我哋第一次做呢類型嘅商場展出，因此公司上下都為此努力中！雖然展出期會係10月，但係其實前期工作例如要設計啲介紹牌，畫好整個位置嘅設計圖都需要現時去準備了。呢次任務我哋主要交咗比兩位年輕同事去負責，佢哋都好想試吓一手一腳由頭開始做，我都希望呢個展出會成功！大家到時都多多支持。
#6 神秘計劃 Project A
今個星期我亦都在籌備神秘計劃 Project A。Project A 其實係我好耐以前已經想做嘅計劃，大概5、6年前吧，但一直無合適嘅機會去做。今年1月，我再次將佢拎返出嚟，並且開始一步步了解點樣實踐，當中亦有好多學習過程。今個星期事情有咗啲重大發展，現時我哋已越來越近可以將佢實踐了，呢度先賣個關子，呢個係一個大 Project，我日後會再喺未來週記同埋其他途徑同大家分享。
#7 改善包裝內說明書
我哋呢個星期亦再一次更新咗 Re Pillow 系列包裝內嘅說明文件。因為以前雖然亦有一啲使用說明、清洗方法嘅說明書放在盒內，但一向有一個問題就係有啲人會當佢係垃圾而忽略佢，甚至當垃圾掉咗佢….. 以致有時會唔識點樣去保養使用等。咁又難怪嘅，大部份啲包裝內說明書都係一堆免責條款同八國語言，好多時我揭兩揭，都會好快掉咗佢。因此今次說明書我哋多咗啲大字重點，開始使用方法等，應該會較易消化。除此之外，亦都有啲常見問題以往我哋嘅說明書內容無涵蓋，今次亦都添加埋落去新嘅說明書到。
#8 環保包裝
今個星期我哋亦都啱啱收到早前設計同托紙盒廠做嘅環保版包裝盒！我哋一直都想推行更環保嘅包裝，主要原因係因為枕頭嘅包裝盒其實都比較難用得返，而我哋亦有唔少客人反映過，佢哋買完比自己後，瞓過覺得好瞓，因而再買埋比屋企人，屋企有咁多呢啲包裝盒好浪費。又或者有客人亦都反映，其實枕頭都係買比自己自用，包裝無需要咁精美。而現時我哋嘅包裝盒因為係好似其他枕頭公司咁，係紙質但亦包了一層啞面膠膜，雖然係可以回收，但係回收公司都需要做多一個步驟先除去咗嗰層膠膜先會回收到，變咗就唔夠環保，亦都唔係100% recyclable。有見及此，我哋嘅環保包裝會用返平日啡色嗰種嘅紙皮去做，100% recyclable，而且個尺寸比起以往會更加 fit，可以減少體積浪費，節省運輸能源。
下星期尾左右，環保版包裝會喺最多人購買嘅 Re Pillow 2 到開始實施，舊嘅、較為精美嘅包裝亦都會繼續可供選擇。如果環保版包裝反應唔錯，我哋亦會將之推廣至其他產品上。
#9 最後：本週趣事
最後講返週記初頭想寫嘅本週趣事！
係咁嘅，話說我哋有一個車衣同事，佢今個星期有日話琴晚同細妹傾電話，佢細妹係咁話佢近排買咗個枕頭好好瞓，跟住我哋同事就叫佢影張相嚟睇吓啦，睇吓咩枕頭打算買個俾自己。
點知一睇細妹 send 過嚟張相，咦，咪平時每日車緊嗰個😂😂😂 隨時佢細妹係用緊佢整嗰個
所以即使佢之前無用，嗰朝即刻員工價買一個返去。
100% 真人真事。
P.S.
Re Pillow Co. 嘅 product/ design/ business/ innovation team 到目前為止其實都係「one man band」，都係我來的，因此忙起上嚟真係好忙，好似今個禮拜咁。
Fun Fact// 以前為咗扮到有啲規模，加上自己覺得一個人做枕頭好羞家，成個咩咩 Re Pillow Co. 原來都得一個人，嘩，好醜呀。因此當時我特意整咗好多個「虛擬同事」，有 Charlotte、Carmen、Kenneth etc… 用呢啲名嚟做email、message 嘅下款，但其實全部都係我一個人來的… 後來我都慢慢接受咗呢個現實，因而亦無再扮了。雖然到依家，我都會因為好似所有嘢都好多自己一個做哂而覺得自己好渣。
今個星期就寫到呢度，下週再會！
#010（07/08/2022）
#012（21/08/2022）