#028 新嘗試、小小關於 Re Pillow 3（11/12/2022）

（圖：即將開幕的新店）

2022 即將完結，匆匆走過了12個月，今年你過得好唔好、開唔開心。今年年初為自己定立嘅目標，有幾多做到，又有幾多未達成？一年好快，時間悄然流逝，我哋每一個人其實都有自己想達到嘅目標，未必係好偉大嘅目標 --- 可能只係想自己做事有多啲勇氣，可能只係想愛自己多一啲，又或者簡單啲，同嗰位他表達自己一直嘅愛意。

因此其實最近一段時間我喺度祕聞籌備緊呢個小計劃，希望可以趕得及2023 年1月1號之前可以推出， 想大家喺新一年有一個好嘅開始。呢個會係一件產品，但唔單係一件普通產品。佢係會係一個對自己有意義嘅產品，一個可以幫助你去達成你目標嘅小玩意。先賣個關子 ---

其實呢個小嘗試都真係因為我想做，因為開心所以做。但重頭戲，最忙最忙，最重要放最多時間，就當然係 Re Pillow 3！

關於 Re Pillow 3，我想說的是 —

如好早已睇我哋週記就知，今年年中時已經有喺週記提到準備緊 Re Pillow 3 嘅事，事實上如果講最早最早準備緊 Re Pillow 3，應該係今年2/3月就已經開始緊。我可以大膽講，新一代 Re Pillow 會係今一代嘅大大改進版。好多方面都係有改善同改變。我會覺得 2020 年嘅 Re Pillow 1 係一個 Test of a concept。齋論product而言，Re Pillow 1 係比較raw啲，比較似一個「小朋友做手工」嘅產品，好多細節位同造工都係不及市面上其他產，產品亦都可能唔係太commercialised到，包裝內連使用說明、清洗說明、聯絡方法都無。而 2021 年 Re Pillow 2 係一個 refinement of concept，整體成件事係Much Improved，由包裝到使用說明到售後服務，係一個都真係OK啲，雖然依然自己一個人做，但睇落feel落，成個體驗同product都拍得住市面上同價位或再貴啲嘅枕頭，應該亦會有一部份人會覺得甚至好過市面上其他枕頭 product。而嚟緊 2023 嘅 Re Pillow 3，我自己覺得會係一個完全再真係令人會覺得 Wow 一聲嘅 product ，佢會係超越咗前2代嘅嗰個框假個感覺，會有一個，嗯發明嘅人真係有啲諗法放咗入去，係真係一個成日用枕頭同日諗夜諗嘅用家，呢個係真係一個好嘅設計。但同時間，佢都係三代 Re Pillow 入面風險最大，最有機會出事嘅 Product，佢可以好失敗，失敗到啲人寧願要返 Re Pillow 2。

但我個人相信做人唔可以下下行騎樓底，跌低起翻身啦，唔試又點知。同埋有時都要信自己。

唔想講得太白但大概就係咁，題外話依家諗緊個 Slogan... any idea? 

回顧下啲舊Slogan（應該無人知，你係其中一個！）

Re Pillow 1: Pillows Redefined.

Re Pillow 2: Two is better than one.

Re Pillow 3: ????

如果無咩嘢我就再返出去 Google search 搵下靈感... 下星期見！