#029 關於創業（18/12/2022）

今個星期實在好忙搞尖沙咀新店開張之事，本來真係就快搞唔掂趕唔切12月17日開，但迫迫下又做得切，但身心俱疲，我想沉澱一下再寫返開尖沙咀舖嘅事，因此今個星期講下第啲事，請諒我想用呢個方法比自己抖抖 ---

最近喺唔同場合遇到唔同人，大家都講好多客氣說話， 喺度就唔多講啦。不過當中有唔少人都問過我一條問題，我覺得值得喺度寫寫，分享少少淺見，可以幫到一啲有興趣創業，或者好似我一樣，剛剛起步嘅人。嗰少人問我個問題就係：「你有咩目標或者願景？」

可能以下講嘅嘢就唔係好好聽：創業係好容易失敗的。有邊個開始做一件事唔係滿懷宏圖大志，創一番事業？大家都一定好熱血的，但現實係99%創業嘅人都係失敗收場，所以創業一定要有心理準備。創業有機會令人失去所有積蓄，過程艱辛。我都經歷過而且依家每日亦喺度經歷緊呢種生活，而我亦都好明白，縱然我自己有幾有心，有幾努力，世界從來都係公平嘅，可能我做嘅嘢真係唔能夠配合到市場需要，或者我喺經營生意，推廣策劃、管理人事、成本控制，技不如人，隨時可以失敗收場，我好明白亦都會欣然接受。創業其實就係咁樣一回事。

我都坦然其實我並無啲咩宏大計劃，好多人創業都有好多唔同大計，但我實在係無。我比較相信有時期望同目標越大，會令人更易離開現實，到遇到現實困難時會覺得更苦惱更意志消沉，理想同現實落差太大，令人更失望同想放棄。我相信嘅係每日只係做返啲小事，做好自己本分，唔好諗嗰啲咩大大大夢想先！將其實本身自己要做嘅嘢做返好，咁已經好唔容易嫁喇。有時間就再進一步，唔單止係做好今日自己嘅本分，而且仲繼而將做緊嘅事加以改良，喺小處到小小小小咁一件件做好，咁就會聚沙成塔，整件事會有好好嘅進步。其實做到呢一點，比起只諗一啲大理想，會更加真正正面咁影響到客人嘅體驗，令自己嘅創業計劃可以更大機會成功。