歡迎大家嚟到睇今日個星期嘅週記。 今次係第30篇週記了。其實去到今日，我已經知道週記係一個冇乜人睇嘅嘢，寫出嚟，大概係釋放下自己啲壓力同情緒，作個記錄。有渠道寫下嘢咁樣。
今個星期會先講一啲我喺營運上做咗嘅 Update，再寫啲其他嘢。
1. 網站落單，門市取貨
今個星期四開始，我哋可以網上落單，門市取貨。主要係為咗方便大家唔洗等送貨，亦都唔洗話屋企常常有人喺度 Ready 收貨，方便大家。其實呢樣事情一早已想做，但之前間店舖只係細細間喺太古城，地點上未必太方便好多人， 而且嗰度亦都唔放唔到太多貨，好難安排確保客人去到就一定有貨可以取到。現時尖沙咀iSQUARE 店開咗，地方方便一啲而且亦都有貨倉可以裝到多啲貨，就可以讓客人網上落單，門市自取。 不過其實最主要原因就係因為生意唔好啦，近排好靜...... 喺網上收到單之後，門市職員會即時喺自己部 iPad 度見到 有客人要來取貨以及需要取的貨品嘅詳情，可以即時執好啲貨等客人嚟拎。門市職員執好之後亦都會喺 iPad 撳一個掣，系統就會即時通知客人可以隨時來取貨。
2. WhatsApp Chatbot
為咗方便到客人可以即時查詢一啲最希望知道嘅資訊，以及快速解答客人問題，我今個星期亦都整咗個 WhatsApp Chatbot（自動對話系統）。客人可以透過WhatsApp 聯絡我哋嘅系統，並且喺唔使打字嘅情況之下，可以選擇唔同嘅問題同埋查詢，可以自助幫到自己。當然，如果有需要，系統都可以比客人聯絡我哋真人客戶服務協助。喺度試玩：https://wa.me/85291510825
我哋規模實在太細，做唔到 24 小時有人回覆查詢，有時做起嘢上嚟，都隔好耐先覆，我希望呢個系統可以至少喺我哋無人嘅時候，可以幫到下客人解決一啲簡單問題，方便到客人。例如有時客人會問門市嘅開放時間同埋詳細地址，但係我哋如果隔咗幾個鐘之後先覆，可能都夜晚，客人已經走咗。咁所以依個 WhatsApp 自動回覆系統就可以自動解答到佢嘅問題，就唔會打亂咗客人嘅計劃。
3. 更專業啲嘅門市管理
講起嚟都慚愧。其實以往我哋整件事嘅營運方式，似係一班朋友自己去做一件事， 而唔係好似一門生意，專業嘅去營運。有時候遇到嘅問題就係當有一啲突發嘅情況，又或者當產品開始多，事情開始複雜，我做起上嚟好吃力。每一個人嘅做法都唔同，因為完全冇一套標準去跟從。我嘅心神時間就會去咗要處理各樣嘅情況，自己好辛苦，而且營運亦都做得唔好。 假若一名客人將我哋同一啲專業嘅大品牌比較，會覺得我哋喺營運管理上完全比下去。其實呢件事都搞到我好苦惱，好似我好努力掙扎，但係做極都係不斷處理一啲好基本嘅問題，做得差過人。好慶幸最近請咗一名喺門市銷售好有經驗同資歷嘅朋友幫忙，俾咗好多實質嘅建議我，令到最近一個禮拜確實門市營運亦都好似順暢咗，我亦覺得放心咗。實在感恩。有時可能真係當好 Stuck 喺某一個位，我哋需要嘅其實係一個有經驗，有呢方面嘅知識嘅人去幫自己。
4. Re Pillow 需要一個更好的我
唔好理上面嗰啲，只係呢篇嘢我其實想寫一個主旨，我最近覺得，Re Pillow 需要一個更好的我。
其實喺過去畢咗業半年，我大概睇到，現時我係 Re Pillow 最大嘅阻滯。Re Pillow 可以撐得住係好有賴好多同事幫忙同努力，但我覺得自己唔夠叻同努力去將 Re Pillow 帶大家去一個更高嘅 Level，我覺得我個人仲未夠好，唔夠勁。一間小公司做得好唔好，其實係好睇嗰個領頭人自己個人係點。假如佢自己都係唔夠叻，咁間公司做得勁極有限。我唔介意自己個人榮辱，但我好想好想可以做得好啲，可以真係做到一啲令大家自豪嘅事。而我知道呢樣嘢唔易。我知的。因為如果係易嘅，咁就人人都做到。但以現時依家嘅我，不論係管理、產品研發、市場宣傳、時間管理、宏觀計劃，各種技巧都唔夠。如果 Re Pillow 要上另一個 Level，我需要改變自己，令自己各方面都更好，咁先可以帶到 Re Pillow 去遠啲。我其實有好多時都好灰因為真係好難。但我好清楚，這是唯一出路。
其實今日（25/12）係我25歲生日，以上係我今年嘅生日願望。
下星期見！
#029 關於創業（18/12/2022）
#031 Refresh 的背後理念（01/01/2023）