#040 將太古城店搬到北角港運城（05/03/2023）

圖： You know what it is… coming probably last few months of 2023… 

首先寫呢篇野時我想講我嘅精神狀態係有啲唔係太好，寫緊嘅依家係3月3日星期五20:38，我一個人坐喺屋企，用電話內置notes app 打以下呢篇嘢… 題外話，我好鍾意用呢個 notes app，基本上所有我做嘅產品所有計劃，全部都係喺 notes app 度出來的。而且唔知你覺唔覺？用電話打嘅文章，感情更真摯。

搬去北角港運城

講返今日正題：搬舖一事。係，由於太古城嘅一年短約即將於三月底完成，我們會搬過去都是太古地產旗下的北角港運城商場。呢個商場其實知名度唔係太高，但係點解會揀嘅原因就係因為同屬太古地產，而太古地產實在幫咗我哋好多，以及對我哋好好，我都希望可以繼續同佢哋合作，因此決定搬去北角港運城商場。而今個星期就係忙緊開始裝修嘅事情。

開新鋪的問題

其實要開一間新鋪呢件事之前都喺尖沙咀 iSQUARE 經歷過了，每次開舖都會比較多少少嘢做。未至於話去到多到搞唔掂嘅，畢竟都係正常人可以做到嘅範圍內，但最主要個問題係因為得我一個人做，所以會再多嘢做少少。eg. 通常一間公司呢啲開一間舖喺商場，佢哋會有設計師去諗吓點 layout、配襯顏色，再畫嗰啲3D像真意想圖、再畫埋啲貨點擺，裝修物料細節燈光等。但係喺我嘅情況，以上嘅嘢全部都係我一個人做，而我自己嘅問題係，其實我唔識點樣做呢啲嘅工作….. 所有咩畫圖等都係要自己自學。其實真係好難好辛苦好唔想做，因為我都唔係真係做呢個嘢嘅人！！不過我知道呢個都係過程，係學習，或者有一日我會可以同人哋講返呢啲嘅經歷，畢竟人生就係由不同嘅呢啲經歷同埋故事去組成。其實我最唔開心唔係辛苦，而係啲設計出嚟吃力不討好….. 例如尖沙咀門店貨架太過高，深色和淺色的木板其實不配襯，多咗好多空白地方浪費….. 種種問題，真係好抌心口，但係都冇辦法唯有照用住。暫時我想將Focus擺喺產品上。因為舖頭地址會來一次，但係產品你會用幾年，喺資源同時間非常缺乏之下，產品做得好先係正道…… 唔係嘅話你整到間鋪有幾靚又點樣，產品唔得就係唔得。

不過我承諾北角嘅舖頭，一定會好過尖沙咀嘅舖。而尖沙咀嘅舖亦都已好過我哋第一間嘅太古城嘅舖。北角嘅舖頭會比尖沙咀細，大概一半左右，但係雖然細佢會善用地方同埋裝飾都會比尖沙咀好（至少我努力緊向呢個方向…..）

為何不接受資金

今個星期都有一啲 Funding 同 venture capital 招手問我有冇興趣….. 其實當然有啦，有多啲資金又點會唔好….. 至少每個月請多個人幫手分擔下工作都好吖，自己唔使咁辛苦。不過最後都係拒絕晒了。因為其實我自己都有一啲仰慕，曾經都係初創嘅公司，而佢哋都係靠自己一手一腳經歷所有嘅困難，辛苦等等嘅日子，最後去到今日我好仰慕嘅 hero’s story。我好記得睇過一個 Ben Francis 嘅訪問，佢係一個我其中好尊敬嘅 founder，佢講話佢公司發展過程之中，其中一樣嘢覺得自己做得啱，就係冇得到任何 external funding，令佢好多嘢都要自己跌跌撞撞，學習，唔可以靠錢去 fast track 同 skip learning curve，長遠係令到佢更有能力去發展個生意。Its very true，授人以魚不如受人以漁，學識點樣自己冇資源嘅情況底下捉魚先係最叻。所以，我希望自己做到吧，今日2023年3月我喺度立此為記。

我們的規模

最後想講多一個唔關事嘅嘢，今個星期亦都覺得好似大部份人都太高估咗我嘅規模，佢以為Re Pillow係一Team人可能有6-10個或者更加多人去一齊喺 office 處理各樣工作… 其實大部份工作都係嗰1-2個人來處理的，一個係我一個係我大學時認識嘅同學阿Ben…… 不過受到人哋咁樣睇起，其實我自己都開心嘅！好似自己同 partner 乜鬼都做晒，居然扮到俾人印象好似大啲規模咁，好似都幾好呀…… 除咗可能個expectation 會有啲大之外。

今個星期就講到呢度，我會繼續返去畫裝修啲圖。

ARGHH！真係好唔鍾意畫裝修圖呀！！！