#041 Re Quilt 2（12/03/2023）
圖：北角新舖今個星期開始裝修
經歷多月設計、來來回回、改來改去，加功能、試物料，搵SGS 驗，我稱之為 RQ 2.0 嘅 Re Quilt 2 相信應可於4月正式推出（唔知四月初得唔得）。呢一件產品唔單只係一件普通嘅產品，佢我覺得喺多方面係標誌着我哋 Re Pillow Co. 產品嘅新一頁。呢件產品之前其他產品其實好多都係比較似做小手工、比較「土炮」一啲嘅做法，亦都比起呢件產品，我覺得唔係真係咁專業同去到咁勁。今次呢個 RQ 2.0 人會係 The Beginning of the Next Phrase of Re Pillow Co.。反正週記冇乜人睇，所以我就喺度寫下：
- 一個完全冇人做過嘅創新設計：一張被姐！究竟可以有啲咩特別？今次呢張被真係同第一張唔同。第一張被 Re Quilt係一張好優質好正常嘅被，可以話係一個好好嘅開始點。但今次做到一個非常創新嘅嘢，我甚至認為呢一個 RQ 2.0 創新嘅程度係比起我哋最出名嘅Re Pillow更加好，而且係一個我覺得啲人見到會 Wow 一聲嘅 Design。
- 確立 Re Pillow Co. 係一個 quality、innovative、local、passionate 嘅床上用品品牌：今次呢個產品因為真係投入好多時間去做，比起再之前嘅Re Quilt Re Pillowcase 投入更多時間。設計嘅過程好難捱，係因為其他人會expect你做得更加快，會覺得你咁耐都冇新嘢嫁！但係因為咁樣，所以你就比自己更大嘅壓力想做得更加好，免得真係推出嘅時候人哋會覺得「哦！都係咁樣」，結果越做越慢，迫使自己更加完美主義，遲遲未能推出。點都好，現時已經接近尾聲，即將可以推出，我希望可以唔好令人失望，亦都可以幫助建立我哋 Re Pillow Co. 嘅形象。以前眾人認識我哋可能都只係個枕頭，而家多一個產品可以參照到，比人哋睇到究竟呢個牌子做嘅嘢係點樣、質素係點樣、設計係點樣。多一個 Reference Point。
- 增加枕頭以外 offering，建立完整床上用品線：我希望搣甩只賣枕頭形象，張被都係我哋主要產品之一，逐步建立一條完整的產品線。通常叫我哋個brand嘅名，Re Pillow Co. 永遠都唔會記得個Co.，即使我喺網站頂頭 logo 已經唔會再寫 Pillow Co. 字，只係一個方格 Re，啲人都係叫Re Pillow。希望呢張被推出之後可以會有啲人都欣賞到我哋其他產品，因為畢竟現時主要大部份人只係買枕頭，買一個用好耐，確實係令經營上面唔係一個最穩固嘅方法。希望日後其他產品越早越好，都可以得到其他人欣賞，為公司提供多一個收入來源，令到我哋要執笠嘅風險低少少。
今個星期一，我都去咗國內嘅廠去睇Re Quilt 2 嘅事。確實因為地方問題，今次依一張 Re Quilt 2 到同上一張 Re Quilt 一樣，只能在國內製造，做唔到香港做。其實我明白有啲人真係好想被都可以香港製造，其實呢樣嘢我都糾結咗好耐。如果香港做被的話，我哋就會繼續好似做小手工咁樣，因為手工做，效果會比國內廠用大型機器差，而且最後出來嘅售價會貴好多…… 我諗嗰個價錢對比嗰個質素，其實真係唔太合理。唉，香港實在土地太貴，有時扼殺咗好多呢類可能性。當然，香港嘅地應該留返做一啲更加高增值嘅事情，都係合理嘅。
