#042 新床、新被、新階段（19/03/2023）

歡迎來到本週週記，講講本週 update。

終於有張床

今個星期我們葵涌工廠，終於放到一張床可以試自己嘅產品同埋實際試用同測試！！如果大家有睇過之前Mill Milk或者星島嗰條短片訪問，就會知道其實我哋係一間非常細非常之狹窄嘅廠仔。乾淨衛生、但係地方細。我就係喺呢啲地方去生活同做嘢…… 所以有時大家唔可以怪我寫嘅嘢好似無病呻吟定係點樣…… 係真係喺比較困難嘅環境入邊做，絕對唔係可能有時有客人幻想一個可能有政府資助數碼港或者科學園嘅Start up ，點樣玻璃房寫字樓嗰啲。今個星期我執整咗啲地方，騰出地方擺一張床可以測試自己嘅產品。以往測試產品全部都要拎返屋企/出面其他地方去試，因為床都沒有。（我試過要特登要拎prototype產品返去大學一啲冇人睇到嘅公共空間，偷偷摸摸放出來試，因為自己屋企地方唔夠大，廠又冇位……）今次終於放到一張標準雙人床直接喺公司！所以試嘢嘅流程都順暢咗好多！好開心！我覺得係近依半年來最大嘅突破！

Re Quilt 2 推出日期近了

上個星期週記提到嘅新被，相信可以預期喺四月內推出。同事成日會半講笑咁樣講我係一個完美主義者，成日啲嘢做吓又加樣嘢做吓又「想再做好啲」，結果通常推出日期都會越來越後。聽來好似係讚賞，但其實實際上係有問題。所以我依家通常夜晚離開公司之後，會準備定啲任務返屋企做，多數係一啲文件嘢、畫圖嘢，一個人自己在家可以處理到的。咁樣，我編排哂所有唔可以喺屋企做到嘅嘢，密密麻麻喺公司處理，盡量唔好喺公司做到一啲屋企都做到嘅嘢，嗰啲留到返屋企先做，從而令到每日可以做到更多工作。Re Quilt 2 推出日期近了。

一個新階段之前的寧靜

喺我哋呢個新產品推出之前，其實近排都比較靜，難免有時候有啲人都會懷疑同埋擔心…… 但係我信有啲事情，如果用心去做，總會有人欣賞的。只要唔好放棄，繼續努力，一切都會變得好。