#043 包裝盒、北角門市裝修、與 Marketing 公司的一席話（26/03/2023）

每個星期我都會留啲時間寫週記，多數一寫都寫一個到幾個鐘，寫寫下都原來接近一年，當中當然有啲寫得有心機啲、有啲寫得差啲，但總算都有 Keep 住寫。我知道呢度睇嘅人不多於十個，亦都可能睇嘅十個入面，九個都係用十秒速速睇一次，但咩都好啦，感謝每一位 Click 入嚟睇嘅你。

包裝盒

今個星期喺度整 RQ 2 嘅包裝。喺度 Brainstorm 啲包裝嘅時候，發現被嘅包裝有一件事係同其他產品唔同 — 包裝需要顧及好多Size。首先被本身已經有唔同尺寸，再加上唔同厚薄，因為被本身都好大件，摺出嚟嘅時候，不同厚薄尺寸嘅被體積會差好遠。所以或者難怪市面上嘅被多數係搵啲有拉鍊嘅環保袋/不織布袋去裝 —— 一個袋可以 share 唔同被用吖嘛。

以我哋嘅情況，我哋要照顧網上單要速遞，唔可以軟奶奶一個袋去送貨，一定要用盒。如果整咗個軟奶奶嘅袋去門市賣，然後上網賣又喺袋嘅之上再加紙箱，感覺又好似雙重包裝，因此，我決定都係統一用箱。不過之後有再厚嘅被出嘅時間可能要有唔同size嘅盒。

北角門市裝修

由於港島門市即將由太古城搬到北角，呢個星期繼續喺嗰邊進行裝修，好在前期準備功夫做得好（早一兩個月真係做得好痛苦），即係畫圖度尺、訂造家具等功夫做得好，而家一切都尚算順利。應該4月中尾可以開幕。

與 Marketing 公司的一席話

剛過去嘅星期五亦都好慶幸獲香港某大型 marketing/ content 網站邀請去佢哋寫字樓傾傾大家會否有合作空間。我同 Ben 兩個去會面，坐入佢哋嘅office嗰啲玻璃conference room，有住一啲大型presentation電視同長枱再圍住有啲碌碌 office凳，真係好羨…… 畢業我同 Ben 兩個都係坐緊摺凳 share 緊一張單人枱，個電腦甚至電話睇緊咩隔離都睇到。okok唔好side track，咁話說當中會面一個鐘，除咗冷氣真係好凍之外，我最印象深刻係佢問咗我一句說話：

「係呢，咁嚟緊 Re Pillow 嘅 marketing plan同 schedule 會係點？今年有冇咩主力想推嘅 product 同 campaign？你知，母親節父親節就嚟，呢啲都係每年大日子，有冇諗會點推？」

我係當場呆咗唔知點反應，因為確實咩marketing 大計我係無的。有啲似以前大學一年班某啲法律導修課，當時我尚未摸清讀書模式同標準，結果就比導師問到口啞啞，尷尬不堪，因而當日之後即用功讀書，唔再等類似情況再發生。今日喺 marketing 公司度重新面對呢種感覺，既熟悉又陌生。我支吾以對。或許佢哋一早已睇穿我不善辭令，又或者佢哋做開呢行廣告宣傳，好識對答，都無再追問，大家好快講咗第啲嘢，無再問落去。

I just want to lead a simple life create a true and honest brand that makes great products… 用家開心，我就開心。宣傳大計，我其實真係冇……

可能去到遲啲我會有需要？哎我都唔知，太複雜太長遠。依家先專注做好啲手頭上工作吧。

RQ2 - coming soon.