#046 極忙的一週、遲到的週記（16/04/2023）

圖：北角新店

首先抱歉，今個星期週記遲到，現時寫緊嘅時候已經係凌晨1點，比承認 12 點遲咗。今個星期週記要遲啲了。一向我都係預早寫好，等個system到時到侯準時自動公開，但今個星期實在太多事做，好忙好忙。尤其是呢兩日，搬貨、執好間舖、然後抹嘢，並且執返最後甩漏，臨近 17/4 開幕，就越忙。今次北角呢間舖嘅整體設計、心思係比起之前尖沙咀做得更好。

對電車路的落地玻璃

首先，舖頭向北係落地玻璃，向住英皇道電車路，呢個係當時睇舖揀嘅原因之一，對街有落地玻璃，整間舖都會光猛明亮，採自然光，感覺會舒服啲，呢個係我都好著重。尤其能夠對住電車路，係一件好事。電車代表住一個時期嘅香港，喺佢仍然未被拆走之前，能夠喺舖到睇到電車路都係一件好事。

題外話，以往有一段時間住上環，獨自一人搭叮叮（電車），坐上層，吹住風，由上環北園酒家上車，落銅鑼灣買生活用品或約朋友，感覺好逍遙。當時係 2021 年，Re Pillow Co. 仍然喺無人認識嘅階段。

產品試用區

產品試用區喺北角係同尖沙咀唔同，因為整個 area 係特意做到 homely 一啲，直程係希望做到有種區隔嘅感覺。其實若然仔細睇，會發現舖內用咗兩種地板，喺產品試用區，放床嘅位置係用咗另一種顏色地板，用以區分兩個 area。呢度我加一張日間影嘅相落去，睇得清楚啲：

而張床係輕輕出咗地下個格仔，寓意 Think outside the box。喺床隔離嘅高櫃亦有得掛被，唔洗再疊埋。

喺舖內亦都加咗兩個竹籃，可以方便客人上床時放袋。靈感來自拉麵店好多時出現，比食客嘅籃仔，因為我同朋友/同事/以前大學同學阿 Ben 耐不久都會食拉麵，我喺嗰度觀察到之後覺得好合適而用的。變咗客人嚟到，可以放低袋，好似返到屋企張床咁，感覺輕鬆啲。呢一切一切，都係改善咗嘅細節位。

格仔收銀櫃

舖嘅另一面係收銀櫃，我整咗一個發光，格格櫃桶嘅設計，內裏其實係用嚟比我哋可以放枕頭套！我想可以日後出到唔同顏色，每行一隻色咁樣，咁會更加靚，但我一個人做唔切，所以暫時，我砌咗個「Re」字，頂住先。

舖內配色

上次尖沙咀我用咗白色鋁板做牆身，用淺木色做地同貨架，深木色做床同收銀櫃。後來我覺得鋁板做牆做出嚟先發現有啲冷冰嘅感覺，我喺度貼一貼圖比大家睇睇尖沙咀舖嘅裝修：

今次汲取經驗，改咗用哂木色做地同牆，而所有嘅床、櫃、收銀櫃則用白色，整件事得覺得warm啲。喺尖沙咀其實用多啲白色還好，但北角對住呢個街景，出面已經灰灰白白，店內用返木色令到整個感覺柔和啲。下圖為北角：

其實兩間舖嘅裝修風格都類近，但係係有輕輕不同。

另外，仲有一個細節位：如果比較上面尖沙咀以及下面北角嘅圖，會發現職員進入後倉嗰度門都改善咗，變得隱閉，客人唔會見到有一個好明顯嘅門框。

所以真係一路做，一路學習同進步。我亦都會將一啲北角店裝修上做得好嘅原素搬去尖沙咀，慢慢等尖沙咀都做得更好！所以下次去尖沙咀嘅時候，可能有啲設計已經搬咗過去。

完！