#047 與快將移民的客人對談、香港國際家用紡織品展（23/04/2023）

與快將移民的客人對談

話說今個星期北角店啱啱開幕，頭幾日由我自己一人看舖，其中有日有位就快移民嘅客人到訪，傾得好投契。當中佢談到其實面對呢個決定，自己都好徬徨，畢竟佢亦有年幼嘅子女。我就聽佢講，都感受到佢嘅擔心同憂慮。當中因為關乎他人嘅事，因此我在此亦唔公諸於世，但我亦好希望佢哋一家人都可以安好，日後喺嗰邊生活愉快。

走定係唔走，從來都唔係一個易做嘅決定。我雖然無打算離開香港，但見到自己身邊認識嘅人一個一個慢慢離開，又或者喺同學朋友聚會言談間大家都會問到大家會唔會走呢啲問題，都真係令我都唔開心。好似現時所謂已經 Post Covid，已經「回復正常生活」，但街上嘅人少咗，餐廳亦都少咗人，但我唔覺得同以前一樣。

我唔知啱唔啱，但我覺得好多人喺香港其實都唔開心，每日返工放工而日復日。尤其喺當呢個時期可能自己朋友都諗緊移民，而整體經濟亦唔係好，可能好多說話諗法喺個心入面唔知點樣講，自己又為未來擔心、唔開心。如果有子女嘅可能亦會為子女憂慮。有家庭負擔嘅亦都因為經濟問題同唔明朗前景去擔心，但呢啲嘢卻係唔知點樣抒發出來，亦同唔到人講。

以前我同阿 Ben（我同事/前同學）曾經喺公司講笑傾過，應該喺舖頭加個「香港人樹洞」section，比大家入嚟傾計，唔洗買嘢，傾咩都得。其實我哋係需要一個呢個空間，比唔同人內心抒發下，同一個陌生人講咗出嚟，會舒服啲。有啲事情係同唔到自己枕邊人/家人講的。奈何大家都知道啦，唔可能的。

香港國際家用紡織品展

今個星期我亦去咗會展嘅香港國際家用紡織品展，喺比業內人士去的，類似一個書展形式，廠商會擺攤檔展出自己嘅產品和紡織技術，主要就係比世界上行內廠商同埋公司有一個機會去大家認識、商談合作。今次係我第一次去呢類嘅展出，我係作為一個 Buyer 角式去參觀的，即係我行展場，睇睇唔同嘅廠商嘅出品，然後同佢哋談合作。當中有亦有一啲與我哋合作嘅公司喺嗰度展出，所以要去打個招呼。

不過今次展會其實參展嘅公司好少，中國嘅廠商佔了9成，當中展出嘅布料、產品亦可能早前喺第啲地方已經見過，因而場內都有啲冷清，其實都可惜，畢竟香港曾經做呢啲國際展，應該都有啲優勢的。其實都想讚讚貿發局，整個展出係安排得好好，而且亦有足夠 Support 去比公司，只係因為參展公司唔多以致可能唔夠吸引，希望下年會更好！