#050 學車衣、環保包裝、新產品、專利申請、向國際出發（14/05/2023）

I put my heart and soul into it, to make us the best bedding brand in the world.

Supporting Your Craziest Dream.

又到星期日午夜 12 點，週記更新時間。今個星期做咗啲咩？一於睇睇：

學習車衣

或許大家都知道，Re Pillow 開初係源於一個我自己嘅小小 Passion Project，我自己喺星期六日借親戚嘅工廈單位自己整枕頭比自己用，但說來慚愧，其實每當去到要車縫嘅嘢，我都要問人幫手車。造枕頭嘅其實工序步驟我都可以自己搞掂，但去到車嘢真係請人幫手。由於近日我花咗更多時間喺新產品上，開始要做好多 Prototype，因此開始同車衣嘅姨姨學車縫，唔洗下下都要煩人哋，雖然唔係車得好，但都叫係踏出一步。車衣呢件事，內裏好多學問，亦都唔易去精，需要嘅係時間、經驗、訓練。現時應該無咩人好似我呢個年紀會車嘢吧，但其實玩落好有趣的。

設計新 mini、Re Quilt 2 包裝盒

自從上年年中，我比咗個目標自己：我希望可以逐漸將 Re Pillow Co. 嘅包裝盒漸漸變得環保。物料要環保啲、可循環再造、用腦去諗更聰明方法解決問題，而過去一年，我哋亦漸漸淘汰大體積較大、有膠膜嘅藍白色包裝盒，換成體積更細嘅、可循環再造嘅啡色、結實嘅紙箱。環保政策詳見：repillow.co/environment 。最後一批仍用緊舊設計、藍白色嘅盒會係 mini 枕頭嘅盒，亦會喺下個月用哂，所以今個星期就喺度設計緊新 mini 盒。畫咗圖：

另外我亦畫咗 Re Quilt 2 嘅盒，設計咗張圖（當然喺呢個每星期得 10 個人睇嘅週記貼嘅圖亦仍未 Finalise，只係想做嚟拎個 Feel），下個星期亦會將呢個盒設計做成實物。

盒係設計成六角形都係因為想更環保。每一張被都會係卷成圓柱出，以六角形盒包裝，其實係可以喺一架貨車裝到更多張被，密舖平面，同時亦唔會如圓柱盒「碌嚟碌去」，在處理上亦係兼顧到方便。手抽設計到用紙皮直出，唔洗膠手抽亦係一啲 Detail 位，可以成個回收，唔需要再拆，或者客人一時唔記得拆就回收，要回收場工人再拆。

I spent a lot of time try to make everything better than yesterday.

題外話，早排家母同我講，其實佢一直有睇我嘅週記，其實得知嗰一刻，自己好感動，因為我唔係一個好擅長表達自己嘅人。平日有咩開心唔開心，亦係自己一個面對。

可能加上自己一個住，心入面有時亦好多壓力、抑鬱、擔心等，都其實無同其他人講。所以知道呢件事，其實感覺原來我唔係孤單，係好感動。多謝妳。

我有時唔知點解覺得，呢一切我面對嘅困難都會過去，會只係其中一個階段，之後睇返會覺得一切都係一個訓練，準備自己喺日後面對更大嘅困難時可以過到。更何況比起好多前輩面對過嘅，我依家面對嘅根本唔算咩。

如果睇緊呢篇週記嘅你都面對緊一啲困難，我知好老土，但都會過的，做自己認為啱嘅事吧，我都喺度一齊陪你努力。

新產品、專利申請、向國際出發

今個星期亦處理緊一啲專利申請，係年底推出嘅產品的。其中一樣喺呢一年學識嘅係，產品要提早9個月至1年準備，如果平日掛住忙平日嘅工作，會趕唔切的，Product 同 Product 中間會有好大嘅 Gap。今年實在學咗好多嘢，包括啱啱提及嘅提早幾多去 Plan 啲 Product，點樣同外國公司交易，點樣安排貨櫃、公證行驗貨、銀行貨款等。Foundation Year for me. 

最後，已畢業一年，Full Time 做 Re Pillow Co. 一年，週記亦就快到 #052，依家慢慢見到自己開始打好Foundation，就要開始向世界出發。Represent Hong Kong，做到最好，令我哋一齊都為呢件事自豪。