#055 Re Quilt 2 生產、世界各地的香港人、香港品牌的思考（18/06/2023）

圖：Re Pillow 3 mini，先賭為快。

監察 Re Quilt 2 製作過程

今個星期上咗廣東5日，監察 Re Quilt 2 製作。係，Re Quilt 2 不能係香港生產。被子因為生產所需的廠房規模同人手都要更大，若要在港生產，最後售價可能貴數百至一千，成本轉嫁消費者，但質素可能仲差咗，我覺得如此實在講唔過去，要客人比更貴價錢買一件更差嘅產品。畢竟，買得嘅人其實係支持 Re Pillow Co. 嘅人，應該係要多謝佢哋同真係令佢哋花嘅錢係物有所值。因此，Re Quilt 2 與上代一樣，均交由廣東一間具規模與知名被廠代為生產。其實呢間廠亦是為我哋做 Re Quilt 1 代，我哋被子交比佢哋做，而枕頭則繼續在香港做。

但因為 Re Quilt 2 是次用料設計全部由我負責，而且製作工序複雜，因此今個星期我亦駐廠留了約一星期，監察生產和確保質素，亦將產品送測。我好想好想，Re Pillow Co. 可以每次都讓客人覺得真係產品真係好好，由頭到尾，設計用料都做得好。要對得住每一位客人，有一日，我哋都可以為 Re Pillow Co. 自豪。

世界各地的香港人

最近好沉迷聽某一類講離別、思念嘅歌。Ciao、留下來的人、今生不回家、隱形遊樂場、給缺席的人唱首歌等等，如果有留意開早期週記嘅人也許會知道，其實自己身邊亦唔少人不再喺香港。有啲事好奇怪，當自己識嘅人離開香港，即使佢未必係好熟，都會唔開心。我嘗試同自己講其實也許有日大家總會相見、搭飛機好快、離別係人生必然嘅課題etc，但現實係自己唔開心。

如果有日有幸，好想喺外國可以開一間 Re Pillow Co. ，可能英國？我想喺舖內搵一個 Corner 放好多香港嘅事物，例如香港巴士、的士玩具、街道牌、奶茶杯、毛巾仔、舊報紙、茶餐廳卡位枱凳、摺枱等，可以聚返大家喺度，亦可比外國人睇到原來香港嘅事物係咁。當然，舖內亦要有產品陳列係真正賣比客人嘅，尤其係要吸引當地嘅外國人，即使 igorne 咗嗰個香港 Corner，佢係一間吸引嘅舖頭，而亦可以讓外國人試試我哋嘅產品。

香港品牌的思考

若然有日，我們不能再在香港生產，就連枕頭都做唔到「香港製造」，Re Pillow Co. 代表甚麼？我知道有些人喜歡 Re Pillow Co. 是喜歡「香港製造」，但終會有日，隨著香港製造成本越來越貴（人工、租金…… 畢竟香港都係一個世界上生活成本、人工都高嘅城市）而再大口懂得車衣和願意從事車衣工作的人漸漸年紀大而退休，或是 Re Pillow Co. 小生產規模不再能夠滿足需求，我何去何從？好似 Re Quilt 我哋都做唔到香港製造。到時終需轉型，慢慢要由小規模製造者變大規模啲，我怕會有人覺得當我哋唔再係 workshop 仔整枕頭，會覺得 Re Pillow Co. 已變質。又或許有日我哋嘅 product 真係周圍都有得賣，可能我唔可以跟得所有嘢好貼，可能某啲人嘅 experience 未必咁好，會有人覺得 Re Pillow Co. 已變了，唔再係以前嘅細 brand 仔咁好了。

我願我可以做到細又好，大又好，都可以始終如一。