#056 Re Quilt 2 下星期三正式登場、品牌定位（25/06/2023）

Re Quilt 2 下星期三正式登場

好快一週，又到咗週記時間，今個星期各樣事情準備就緒，鐵定下星期三晚上十點正式推出 Re Quilt 2。去到呢一刻，我嘅心情係好忐忑。Re Quilt 2 係一件非常高風險嘅產品。因為佢係完全同其他被唔同，有可能市場唔接受。我亦花咗好多好多時間同資源去做呢件產品，如果佢真係賣得唔好，不受歡迎，有可能血本無歸，甚至影響到 Re Pillow Co. 呢啲蚊型公司存亡。佢係我花咗好多心機嘅設計，即使去到圖中見到嘅包裝盒亦特別設計。因為六角形，可以密鋪平面減少運輸空間浪費，結構亦更堅固。同時手抽由盒子𠝹出，唔會用到加膠手抽，環保回收可以整個去做。

Spent so much time on this. Hope that everything would be fine.

品牌定位

呢件事思考左一段時間，唔知道曾經有冇喺度寫過出嚟：是咁的，就係好多人都因為可能 Re Pillow Co. 呢個名令到佢哋覺得我哋係做枕頭，但係日後當然我都希望保持住專注，但係個專注範圍會喺床上用品而並非只係枕頭。為咗避免可能有啲客人反映覺得我哋個名就係做枕頭，而其他嘢只係次要，冇咁好，所以日後將會改名為 Re Bedding。新嘅名入邊都會沿用藍色方框 Re logo，而 Co. 就會省略，因為根據經驗其實冇人記得呢個 Co. 字。

In fact, 當你依家喺瀏覽器輸入 rebedding.com 就會見到會帶你去 repillow.co，係，我已買定咗 rebedding.com 域名。 今次亦借此將個網站由 .co 改返 .com，因為耐不久都有時有人會有誤會......

呢件事過幾個月會實行，為嘅係想大家試下我哋其他產品。

為咗專注床品，現時網站仲有得賣嘅 Re Fresh 香水（https://repillow.co/fresh）亦都即將會停產，專心做床品。嗰個係一個有趣嘅嘗試， 而我都承認當時推出嘅時候，我並冇諗得太多整個品牌嘅定位，同埋方向，都係摸索中。日後就唔會，專注床品，做好佢。