#057 香水賊、RQ2 正式推出、感謝支持的每一位（02/07/2023）

圖：隻貓當咗個 RQ2 盒佢屋企...

來到新一週週記，首先開始之前有一件小事想講：感謝正喺度閱讀緊嘅你。事源係咁：今個星期一，有一位客人去尖沙咀舖頭同我哋店員講話知道香水就嚟會 cut，所以特登過嚟買。坦白講。香水會 cut 一事，其實我冇同公司其他同事討論過，亦都冇喺第二啲地方提到，除咗喺上個星期週記有寫。

所以就知道原來呢個週記除咗我自己睇之外，原來有其他人都有留意，所以想多謝你嘅支持（相信你知道我講緊嘅係你）， 不論係支持呢個失敗嘅 Re Fresh 香水系列，或者係睇我嘅週記，多謝。亦都多謝其他喺度閱讀緊嘅你。

呀係。啱啱提到呢個 Re Fresh 計劃係失敗，咁我都貼返一條link出嚟，係幾個月之前寫嘅，有興趣嘅朋友可以睇吓點解佢係失敗：https://repillow.co/blogs/weekly/038-re-fresh-的賽後檢討-19-02-2023 。佢確實一直以來都銷量不好，係耐不久可能有啲客人購買枕頭嘅時候，俾錢嘅時候聞吓，又幾鍾意咁樣先會加購。

香水賊

來到今日第一個主題，香水賊。

話說今個星期初收到兩位客人分別提到，新購買的香水居然返到屋企一打開只剩下一半！以下貼一貼客人比我嘅圖：

收到呢個信息其實好尷尬，因為個感覺好似我哋呃佢，或者點樣偷用咗啲香水咁..... 而且突如其來有兩位客人都遇到呢個情況，更加唔尋常，超級唔好意思。於是我問咗門市嘅同事叫佢哋去檢查貨存，自己再喺廠度檢查，發現同樣都有都有呢個問題，大概30支有一支係咁。

莫非有香水賊！？ 有人偷用？

哈哈，當然唔係。最後我哋得出嚟嘅結論係，發現有部份香水樽係冇扭到全實，有機會係呢幾個月擺放時揮發咗。原來係咁。

得知之後，我哋都扭返實晒啲蓋，再將有問題嘅香水抽走， 希望今次之後唔會再出現呢個問題吧！

RQ2 正式推出

Re Quilt 2 正式推出，感覺終於鬆一口氣。辛若咗一段時間，每日就好似不斷做做做，然後見到好似生意唔好，門市靜英英，網站無人買，有時同事或客人問幾時出到 Re Quilt 2 我知道佢哋都係善意真心想知，自己都因為咁壓力越大，只能講「就快就快」，同自己講唔能夠灰，要點都做到最好，堅持落去，出嚟要勿令人失望。終於終於，都出咗了。星期三推出，我呢刻寫緊週記嘅時候係星期五晚上， 呢兩日真係感覺輕鬆咗好多，首先冇頭痛， 亦都成個人好似每一刻都感覺開心。其實賣得好唔好都係其次， 最重要係一種感覺終於完成咗：將自己咁耐以來努力嘅成果終於公諸於世， 放下咗一大堆壓力，呢個感覺好舒暢。

不過好快又要繼續嚟啦，有下一件嚟緊年底推出嘅產品都需要盡快做，否則之後壓力又再大啲。 經一事，長一智，將產品研發要提早啲開始。

感謝支持的每一位

最後想感謝支持的每一位，感謝你哋等到而家，感謝你哋比機會我繼續做落去。做產品呢啲，老實講賺唔到咩大錢，其實好多做生意嘅人應該都好明白。但係我都好開心自己可以做到，而實在有賴嘅係大家支持，多謝。