#058 Re Pillow 2 斷貨、Re Quilt 2 一星期、再訪廣東、冬季版 Re Quilt 2（09/07/2023）

歡迎大家來到最新週記，又由我同大家講下最新本週工作同發展。今個星期我同事 Ben 放假，去日本兩星期，所以我就自己一個處理工作了。幸好因為近日淡靜（據親戚話，其實每年6-8月都係傳統床上用品嘅淡季，冬季天氣凍，加上臨近新年，普遍比較多人買床品），自己一個亦非好多嘢做。我覺得淡季簡直係考驗我承受壓力嘅能力，每日睇住咁淡嘅生意好似就嚟搞唔掂咁都要處之泰然，但咩都好，唔好浪費時間，做多啲之後嘅工作。

講講今個星期 Updates：

Re Pillow 2 斷貨

話說現時我哋有 4 個百貨公司點以及 2 間門市，耐不久都要補貨，今個星期三無啦啦知道原來當補埋某一百貨公司嘅 Re Pillow 2 ，Re Pillow 2 就正式斷貨，幸好門市仍有貨存，只係網上要暫時斷一斷。呢個係好嘅，可以建立起一個銷售網絡，有Online亦有門市亦有百貨公司上架，分散風險令到例如一處無貨亦有另一處，或者係客源上都可以有不同，亦可方便唔同類型客人。

Re Quilt 2 一星期

Re Quilt 2 一星期，今個星期有日落門市了解情況以及順便睇睇同事有否有咩問題或需要，發現客人評價正面（雖然都係一窩蜂揀藍色或綠色，粉紅色無人要），不過亦有另一個問題，或許產品實在牽涉好多工序或比較技術性嘅事情（e.g. 針數計算方法、布料如何以吸濕、擴散、和蒸發方式讓濕氣擴散排走，令人可以乾爽睡覺、熱熔工藝等），再加上又可以變形亦可以穿上身，可能一啲同事會有困難去明白，而我卻唔知道以致好似做唔好本份，比唔到足夠解說佢哋。確實我係可以做好啲的。唉，依家打返出嚟都仍然令我有啲唔開心。好似你為別人做完一件事，以為好好，點知原來無人明白你心意，會覺得有啲可惜加嬲自己無表達清楚。不過唔緊要，現時知道，就可以改善，之後知道就可以做好啲。

以前睇書或者啲前輩同我講，「年輕係最好嘅資產」。當時唔明白，現時好似越來越明：早開始做，唔係早啲成功，而係早開始錯，日後可以發展嘅時間會更長。

E.g. 如果我40歲開始營商，可能41先會開始了解同學習如何處理唔同經營上嘅困難同問題，到到可能做得穩定落嚟已經近50。可能做得好嘅時期有十幾年，做到60幾，其實身體同心力上都未必應付到，要退休了。到轉如果15歲開始創業，十年後學識一啲基本營商嘅事，穩定落嚟先25，人生仍有好多年可以發展。我諗以前前輩同我講嘅，大概係咁意思。現時做落越做發現越多嘢學，真係每個行業都有佢嘅學問，而且要學識營商亦係本身一門大學問。

所以如果你係想創業嘅，我十分鼓勵你去做，反正做唔好最多都係執笠，無咩大不了的，好過等等下人生就過了。而且，有心未怕遲，KFC個叔叔都係中年才開始創立KFC整炸雞，而且仲係喺油站嘅雜物房都開始的。

再訪廣東

Re Quilt 2 斷貨，加上有些細節我想修改做好啲，因此今個星期四要上去廣東做 Re Quilt 2 嘅被廠同佢哋傾傾同睇睇佢哋做，睇下有冇咩困難/需要大家一齊解決。雖然現時網絡發達，講電話、視象都好普及，但真真正正坐喺廠內，喺部衣車前面，拎住一塊布和間尺一齊去傾，總係最好。曾經我都有啲唔太想自己一個上去廣東做嘢，因為覺得好尷尬，要自己一個無人陪又可能喺度留幾日，然後要同一啲陌生人 Social 可能又同佢哋食飯又或者日日自己一個食，不如可以電話講到就電話講算。但大約 5 月有日，當時我仍喺度整緊 Re Quilt 2，實在去到一個位我真係覺得，其實為咗 Re Pillow Co. 我可以去到幾盡？日後點樣將 Re Pillow Co. 做到成為我哋香港人都可以自豪嘅品牌？我唔可以再咁垃圾，因為怕尷尬而唔去 Give it my all。所以嗰次之後，我已經no holding back，邊度有需要，香港、中國或者外國也好，當然成本上計算係值得，我就會去。只要係可以幫到件事嘅，我唔會因為「自己唔想」而唔做。

今次上去，亦係要和日本 YKK 拉鍊公司同事見面。日本 YKK 拉鍊品質係行內首屈一指，其實我哋一直都使用佢哋產品，而今次亦都同佢哋大家見個面，之後年底我哋有一件產品用到一個唔太常見嘅拉鍊，因此亦要同佢哋特別訂製，所以要今次見見面，大家傾下，並且下星期開始做啲Sampling。

冬季版 Re Quilt 2

另外，我亦已做緊冬季版 Re Quilt 2，其實4月已有 Concept，一直有做過啲sample，同夏季版 Re Quilt 2 一同設計，因此冬季版係可以疊加喺 Re Quilt 2 上使用的。而當然，今次又會有啲全行首試嘅嘢。今次希望冬季嚟之前可以做好，唔可以再好似 Re Quilt 2 咁，其實 3 月已經可以轉用薄被，可能好多人都開始買被，但我去到6月底先出，Miss 哂個轉季 Window。

依家係7月，大家即管睇下我能唔能夠經一事長一智了。我覺得可以，因為早開始，但 We will see。