（Re Pillow 3 Pro Add-On 盒嘅設計簡單加幾刀，容許開出一個手抽，我覺得我呢個設計唔錯）
歡迎來到本週週記！又由我同大家講講今個星期嘅各樣事情。首先第一樣嘢需要講當然就係全新嘅枕頭 Re Pillow 3！喺週記都講咗超過一年，終於登場。咁時間上確實唔係一個好嘅時間，因為呢剛剛嘅 Re Quilt 2 都係大概一個月之前推出，其實就唔應該兩個產品擺得太埋，變咗前一個產品都未有放足夠嘅時間去宣傳（雖然做咗好耐亦好花心機）但係就有新出產品蓋過咗佢，今次學會咗，之後就唔會再犯相同錯誤，畢竟我都係邊學邊做。
年少就係為了吸收經驗為日後鋪路
年輕就係有呢一個好處。尤其襯時間仲有嘅時候一定要多啲嘗試，努力啲去做唔好慢落嚟，為嘅唔係錢，而係早啲失敗，學識一啲經驗，等日後嘅路可以行得順暢一點。希望如果有年輕過我嘅人睇緊，因為我總係覺得大概 18 至 22 歲其實真係創業嘅黃金時期，因為可能你思想已成熟亦可獨立做決定，亦會係初初步入社會，未算好大財政壓力，所以喺呢啲時間嘅時候多啲努力唔好停！唔需要太執著於錢（因為日後你仲有好多年會為呢啲事煩惱）只需要做你自己認為想試下做嘅事，多啲犯錯，而且去學習。
不在此寫新產品介紹
關於新枕頭嘅各樣介紹，我喺呢度就唔講喇，因為其實我都寫咗一篇介紹，大家都可以喺嗰度睇到，而且更更更重要係，無謂喺度做啲咁商業性嘅事情吖！即係講真，雖然係花咗好多心機去做，但係週記就係寫啲商業以外嘅事情，好似我同你之間嘅一個小對話咁樣，唔係嚟推銷產品的！
忙碌的一週
過去嘅星期日，剛剛回到香港，然後就一直不斷咁工作，因為畢竟返到嚟有好多事情要跟進，雖然兩三星期之前離開嘅時候，其實都差不多 RP3 工作都全部完成曬（貨已經做好包裝緊），但係都有一啲譬如說安排貨去各門市、拍攝產品相片、同埋製作網站、更新網頁庫存系統等等，都係需要做，幸好有我朋友/同事 Ben 幫忙，幫輕咗我好多。有一個唔小心喺呢個星期應該患上了感冒變咗又咳又鼻水又頭痛，體力上實在比較吃力，總算我捱過去了講真工作大家人人都辛苦㗎喇有咩工作係辛苦有時候見到路邊嘅地盤工人工作佢哋約曬雨淋而且體力勞動其實都仲辛苦，所以自己已經好幸福。
踩單車與科學園
今個星期六（昨日）去咗沙田踩單車，因為呢個星期實在工作得太忙太忙太辛苦，打算讓自己散散心，途中經過科學園，入去買支水飲因為天氣實在太熱，而且很多路段都冇樹蔭，昨日嘅天氣係非常炎熱太陽亦都好猛（難怪路上即使週末，基本上唔多遊人踩單車，明明呢條係一條都算主流嘅單車徑，可能大家都入商場或者留喺屋企），入到科學園打算買支水飲，見到佢哋正喺度擺一啲「開心香港」科技市集，請咗好多年輕男女做part time去睇攤檔，講解香港科學園嘅工作，同埋各樣資助進駐嘅初創等等...... 人手過剩到一個地步係好多呢啲請返嚟嘅兼職年輕人（穿著科學園的t恤）基本上都係企喺度撳電話或者三五成群傾計...... 頓時覺得確實係兩個世界。
好多事情我都請唔起人去做，要自己一個做，公司亦都慳住冷氣用，而我經常計數就係苦惱公司嘅財政情況，有時起起跌跌都令到我壓力好大，大概大家睇到過去大半年嘅週記都會感受到。不過條路自己揀，所以就繼續行落去吧，我信經歷過試煉，會可以行得更遠。
#061 探訪各地合作夥伴（30/07/2023）
#063 影片式週記（13/08/2023）