#066 生病、新產品（03/09/2023）

圖： 人手拎啲 Pro Add-On 落去舖頭

生病

今個星期有半個星期都病咗，身體非常唔舒服，頭痛喉嚨痛肚痛屙嘔全部都出晒，自然就會諗起生死嘅問題。 雖然實在過度憂慮，但當你病到七彩嘅時候確實難免會有呢啲感覺。我諗了又諗，喺我嘅喪禮上面，我希望司儀點樣介紹我？到底我短暫20幾年嘅人生，有啲咩嘢想俾人記起？

然後係呢一刻，我就諗起其實大部份人生前做過嘅嘢，其實都冇人會記得住。 即使數返自己嘅爺爺嫲嫲公公婆婆，你對佢哋嘅認知有幾深？佢哋生前做過嘅嘢，你可能只知道幾件，同埋知道佢哋大概嘅人生大事經歷。再數上一代， 爺爺嫲嫲公公婆婆嘅父母， 你可能已經對佢哋全無認知了，其實只不過100年左右， 我哋對一個人嘅記憶已幾近全無。

即使你係香港首富李嘉誠，唔洗長，過多兩三百年，即使假設長實仲會喺度，但李嘉誠呢個人名，對於嗰一代嘅人嚟講只不過係一個人名，亦並唔係好似依家咁出名了。歷史上有好多呢啲令人我哋都係忽略咗，因為歷史上實在太長，好似李嘉誠嘅呢啲人其實多不勝數。

何況好似我呢啲咁嘅凡夫俗子，其實更加唔會有人記得。所以有啲人講話做生意要 Leave Your Legacy，我覺得未免太過不現實，除非你發明咗電燈、電話、互聯網呢啲，否則都好難可以做到 Leave Your Legacy。因此，我諗來諗去其實真係冇必要需要人哋記得，倒不如人生目標就係好好做好自己，盡可能喺有生之年，短暫嘅幾十年之內可以令到更多人開心，哪怕係一刻快樂，為更多人帶嚟更好嘅生活。我諗人生嘅意義大概係咁。當然金錢係有用嘅工具，沒有金錢，連有病嘅時候想去睇個醫生都唔得，所以金錢係重要。但喺「搵錢 --> 洗錢」呢個循環以外， 或許可以能夠喺有生之年令到更多人因為自己做嘅事，快樂滿足，我覺得咁樣就係令到我開心， 能夠死而無憾了。

病到七彩， 但係實在好想將以上記起， 所以寫低落嚟。

新產品

以下呢個影片係我趁喺星期六朝早身體比較好少少嘅時候拍低嘅，並且 upload 咗上去 Re Pillow Co. 社交媒體，拍完呢段片自己打埋啲字幕就即刻病返。不過無論係點都要喺度宣傳下：

（新產品需要你的幫忙！）
（⚠️ 想睇產品示範可以飛到1分28秒）

間唔時都有客人問我哋幾時會推出床單，而事實上，唔推出係因為一直喺背後研究緊一款創新床單，一種可以便於更換，唔使抬起厚重嘅床褥去更換嘅床單。尤其喺香港，好多時床都要兩邊/三邊靠牆，有時好難伸手落去床褥底換床單，以致換床單非常困難以及麻煩，成件事變得一件「苦差」，尤其放工已經好攰，相信唔少人都有同感。

呢件新產品，我叫佢做新床單 Re Bedding（暫名）。關於使用示範，可以參考影片。每次換床單，只需要拉拉鍊，換走 Top Sheet，單手都可以完成，亦唔需要伸隻手去床褥底，免卻咗好多麻煩。

依家。經過多輪測試同埋不斷反覆改良，新床單 Re Bedding首創版相信可以喺年底前推出，但需要大家幫忙，我想收集大家家中床褥嘅尺寸，了解甚麼尺寸比較多人使用，可以分批推出不同尺寸嘅新床單。如果方便嘅話不妨留言話俾我知你嘅床褥尺寸、或者message我們都可以！多謝你！

另外，雖然而家風球已經減弱，但仍然係8號風球，大家都盡可能留喺屋企，小心安全！

-----

如果喺度睇緊嘅你有興趣，可以 email support@repillow.co 告訴我哋屋企嘅床褥長同埋闊嘅尺寸， 方便集中統計研究睇吓做咗啲咩尺寸先。

今個星期就寫到呢度，下個星期再見！