#067 家族生意的未來（10/09/2023）

圖：另一下年推出的產品設計初稿。

最近一兩星期，公司入面都喺度討論緊一啲發展同未來嘅問題，想藉今次週記記錄一下。

或許有啲比較睇得仔細嘅客人知道，Re Pillow 我本身自己喺港大就讀法律及政治時創立的 Passion Project，而雖則它是一個我自己自負盈虧嘅小 Project，但起初嘅時候，確實因為我親戚一直經營著家庭床上用品生意，我亦是有借用佢哋地方同機器去做我嘅「枕頭計劃」。呢件事喺網站 About Page 有提。

一年前，我畢業之後，一直以來家族的生意都係同我 Re Pillow Co. 生意分開，我嘅呢個 Re Pillow Co. 就好似係家族公司（惠記（香港）有限公司）入面嘅一個小特區，自己顧自己，獨立運作，而我亦都唔干涉佢哋家族生意嗰邊嘅事，佢哋亦都容許我有好大自由度去自己處理自己 Re Pillow 嘅事。

最近確實經濟唔好，尤其零售業就更加影響大，否則政府都唔使搞啲咩「香港夜繽紛」刺激消費，實在個情況係幾差下。公司嘅財務狀況就真係唔理想，以致過去兩個星期我都比較苦惱，相信公司嘅同事就好清楚，見到我成日都苦口苦面咁…… 而雖然大家（Re Pillow 與家族生意）係分別各自運作，不過喺公司入面大家都開始討論緊未來點樣行，之後應該點樣面對新嘅經濟環境。似乎經濟上嘅不景氣就唔會咁快離開，都應該仲有幾年，惠記應該點樣行落去？

我自己呢一兩個星期都花咗好多時間諗呢件事，我一個誤打誤撞插入咗家族生意，由我爺爺喺長沙灣營運一間小小嘅柴炭及棉胎舖開始，到到今日嘅 Re Pillow，家族經營床上用品生意已經接近80年。雖然我真係誤打誤撞加入咗家族生意，但既然做得，我當然好想可以繼續承傳落去。奈何我哋喺市場上實在真係一個好細嘅份額，當經濟唔好嘅時候，第一個要執笠就係我哋。所以真係好困難㗎。

當然，唔得就執咗佢啦，無謂喺度獻世。但係我相信只要做好產品，繼續做我自己想做嘅事，充滿熱誠咁去做，或許仲有機會我哋唔使執。至於點做，實在需要繼續努力同埋一路摸索條路出來。