#076 極忙的一週（12/11/2023）

圖：拍片試角度，成個傻仔咁。

歡迎大家嚟到本週週記，又嚟寫一寫一星期回顧。

今日主要想講幾點：1 本週回顧、2 床上用品界的時機和季節性、3 新床單的網站介紹頁、4 初創。以下逐點解說。

本週回顧

今個星期極忙，因為新床單在剛過去的星期五（10/11）推出，而推出前一兩個星期就是最忙的時候，往往都要趕影相、拍片、寫網站介紹等等。而我都唔知點解，明明每次都係最後要做到凌晨然後第朝又早起身繼續趕，但雖然程度上有改善，但都總係最後都係要做通宵。

有時如果產品受歡迎，咁都還好，如果唔受歡迎，有時都會懷疑自己。

床上用品界的時機和季節性

天氣溫度喺本週末突降，而今次我就醒目了，冬天產品於 10 月已準備好，不過因為佢喺推出新床單之後立即凍，變咗要即刻一件接一件，立即推出冬天產品。定於 11 月 13 日，推出 Re Fleece 毛毛被，又要趕影相同寫介紹了。

新床單的網站介紹頁

今次新床單介紹頁，我覺得比以往其他產品做得更好。圖片多、有影片試用介紹、而且我覺得描述產品更仔細，無再有以前我寫嗰啲嘅矯揉造作文字，願佢都可以一帆風順。

初創

有時比自己好大壓力，我見到唔少同期（約2020年）出道嘅 Start Up，好多都無再經營。去 Instagram 度睇下，又或者去一啲文創市集睇，好現實亦好無奈係多啲舖頭仔嘅小小夢想過唔到幾年。佢哋嘅社交平台、網站一個月無更新，之後就兩個月無更新，慢慢就無再更新然後慢慢被淡忘。

我想表達係確實呢件事唔容易，而我有時覺得自己同佢哋好相似。我好記得開初我都係好似呢啲小型網店咁，依家其實亦都係，我有時會自己去睇呢啲被「遺忘咗嘅小店」無再更新嘅 Instagram 賬戶，我睇到嗰個過程係如何地痛心。呢個戶口背後都係人，一個好似我嘅人，曾己何時，呢間小小嘅網店、呢個帳戶係佢嘅一切，佢為過呢個夢想曾經追逐過，努力過，大概亦都有血有淚，但耐何現實逼人，或許佢亦都有經濟壓力，無法經營落去，因而故事只能寫到這一頁，就此擱筆。

我睇到 Re Pillow Co. 盤數，我其實好怕真係會有呢一日，因此常常提醒自己，用心去做，盡量去做，唔好常常同人比較，客人會感受到的。

This is a marathon, not a sprint.

本週就寫到呢度。