#077 明年計劃：專業相片介紹、宣傳、門市（19/11/2023）

圖：我屋企書枱。剛剛將新床單套裝選擇「Top Sheet 顏色」嘅介面由純文字改成「顏色格仔」，客人 Click 上去嘅時候佢亦會顯示埋該款顏色嘅名稱。其實我耐不久說會做呢類網站細執。

____

歡迎大家來到本週週記！又由我同大家分享本週進展。今個星期突然轉涼，我知道好似市區唔係真係咁凍，有啲市區甚至可能仲係感覺 25 度左右，但我呢啲新界人，我哋呢邊凍，當去到 20 度左右已經辛苦，一定要加厚被了，Re Quilt 2 都頂唔到。因此星期一推出咗 Re Fleece，好在產品已一早準備好，只係唯獨係要幾日內要寫好介紹頁面。至於點解介紹頁唔係一早準備？因為喺度忙緊 Re Bedding 新床單。兩件產品，一件 11 月 10 日，一件 11 月 13 日推出，都真係辛苦。不過能夠喺凍嘅天氣時間侯推出到冬天產品，亦收到一啲客人返嚟都讚呢兩件產品，一切都值返了。

有時時機真係好重要，除咗喺凍嘅時候出冬天產品，亦都係關於經濟環境。現時喺 2023 年，一個高息，加上本地經濟前境唔明朗環境下營商，確實唔容易。見到街上好多商舖同食肆都各出奇謀去吸引客人，而且仲要係認真嘅減價，唔係加咗價再減返嗰種，可見佢哋都有困難。我都叫做係做生意，有計數，當然明白個情況。好似我哋自己嘅 Re Pillowcase 2，當客人買枕頭或新床單時，配埋一齊會有 $100 換購價，以往都唔會咁做，原因就亦係顯然易見。現時做生意，確實要每一蚊都計清楚，真係唔易了。

所以喺呢啲時候，打工確實比做生意好。而當你係做生意時，就更需要鍾意你自己做嘅嘢，當你係鍾意時，困難嘅日子會無咁難捱。

明年計劃：專業相片介紹、宣傳、門市

話說今個星期有位同事同我講，大意就係現時 Re Pillow Co. 有一個問顯就係產品嘅宣傳介紹其實有欠真實嘅使用情況同實況拍攝，尤其係門市，令到難以吸引一啲客人，亦都難以比人想像到使用情況。我覺得佢講得好有道理。事實上，如果留意 Re Bedding 頁面，再 Click 去各種 Pillowcase 或 Top Sheet 產品頁，會發現今次其實我加添咗好多實況拍攝嘅圖，雖然都係我自己搵電話拍攝，但其實原理都係想比多啲實境圖片出嚟。

然而因為呢位同事嘅意見，其實實在係好啱，而且呢啲事知道係啱，就要去做，唔好話咩遲啲先云云。所以，我現已開始安排緊做啲較專業嘅產品拍攝，整啲更好嘅宣傳品，唔好再嚟嚟去去嗰幾張相。另外，因為係咁，我亦希望將呢啲宣傳品可以放埋門市，亦都認認真真將門市體驗做好啲。現在已係 11 月中，呢個會係明年大 Project。

亦都好感謝呢位同事意見，其實我都少少知道有呢個問顯，但一路做其他事忙住，就不斷拖，佢講得好好亦都其實好有心，呢啲同事要珍惜。實在要多謝佢。