#079 新床單迷你版 Sample、門市購物袋、澳門免運費、Re Pillowcase 2 頁面（03/12/2023）

歡迎大家又來到本週週記！咁今個星期都非常忙碌，所以講做咗啲乜嘢：

新床單迷你版 Sample

首先第一樣呢就係做咗一個新床單嘅迷你版。圖片喺今次週記的頂部。

做出來係為咗用來放在門市陳列，令到客人可以好簡單咁樣理解整個原理，我亦都製作左一段短片去介紹整個設計！因為產品大件，以往需要翻開張床褥再去講解就會比較困難。有咗迷你版，相信在門市講解時就會簡單得多。

介紹短片我已 Upload 在社交平台及網站 News 一頁：介紹新床單設計（影片）

講起門市，就必須要提另一件事：就係門市冇購物袋的尷尬事！

門市購物袋

話說有門市同事話返俾我知，有時候客人來購物的時候，我哋冇一個合適嘅尺寸的購物袋俾佢，令到有時同事要叫過客企喺舖頭幫手看住間鋪，跟住然後自己跑去其他舖頭，用 $1 買個購物袋，再返嚟幫客人裝好啲產品，有時都幾尷尬。所以有見及此，我決定設計一個環保袋比門市。今個星期就畫咗啲公仔，總共 30 個，都係香港主題咁，希望商業味低少少，大家可以重用。圖：

到時有需要，在門市可以 $20 買來用。

澳門免運費

以往一直澳門是以亞洲運費計算， 不能夠好似香港可有免費送貨服務。但最近週末，我去咗澳門行下，覺得如果要收取運費實在好可惜，因為 留意到佢哋文化上可能都同香港好接近，亦都會睇好多香港嘅嘢，或許有啲人都想試吓我哋啲產品。返到香港之後我計算下條數， 如果人少少嘅話，其實都可以做到澳門免運費試下。因此由星期三開始，澳門亦都可以向右同香港一樣免費送貨服務。希望都有啲澳門嘅朋友可以試吓啦～

Re Pillowcase 2 頁面

今個星期我亦都（終於）整返 Re Pillowcase 2 頁面。 呢件產品大概推出咗有兩個星期， 喺購買枕頭或者新床單時候可以加購，但係佢一直都冇自己一頁嘅介紹頁面。原因？ 因為我一直都忙，一個人搞唔到太多事， 但係人哋買床單嘅時候可能需要配埋枕頭袋，冇理由之後再補返，因此過去兩個星期買係可以，係就一直都缺乏一個完整介紹。今個星期我已經補返了！https://repillow.co/pilllowcase

呢啲事情唔可以拖太耐，因為會影響品牌形象。雖然好多事情我哋都實在規模太細，做得好吃力，但係我覺得唔可以俾人覺得靠唔住，甩甩漏漏。我寧可自己做嘅產品少啲， 但係整個購物體驗都要係順暢，冇得話又錯漏要客人通融的。因為通融係人情，唔通融係道理。我覺得呢個就係細公司同埋真正大公司嘅分別，而客人係會希望你有大公司嘅服務同埋可靠的，如果唔係就永遠都係細。希望繼續一路做落去，可以做到啦。