#099 新床單即將補貨、Re Quilt 2 新顏色、每一個時候都一定有危有機（21/04/2024）

歡迎大家來到新一週週記，今個星期雖然唔係話好多update，但係都想同大家講一講嚟緊會發生嘅事。我係一個普通的人，有時我都好攰，但我感覺或許遠方有人唔知喺邊度或許有日睇到依啲一篇篇嘅週記，因為每一個人時間都寶貴，我想為你哋每一位寫落去，去多謝你來睇我一個平凡人每星期寫嘅真實從商筆記紀錄。

新床單即將補貨

新床單大概由兩星期前開始陸續顏色尺碼開始斷貨，因此我哋都喺度準備緊新一批貨，預計喺嚟緊4月27號左右會補。呢段時間都有啲客人喺門市落單先訂購，我哋幫佢mark好，日後再過來舖頭取/寄送上門。其實確實做新床單係有各個困難，因為有不同顏色不同尺寸，要維持每一個尺寸都有唔同顏色比客人選擇，對於大公司可能相對容易，但係對於我自己一人處理，就會可能有啲困難，畢竟我要經營整件事，有好多不同工作。最近有一位身邊幫忙的同事因為某些原因在大概兩個月之前離開了公司（依件事我都係過了一排依家先能夠講出來），因此令到我自己工作量都有增加，坦白講，有時候都幾辛苦。但係我最近臨瞓前睇緊一本叫 The Airbnb Story（中譯：Airbnb 創業生存法則）嘅書，書中最令我深刻嘅係幾個創辦人創業期間，曾經有段時間要捱麥片充飢，連牛奶都買唔起，只用水沖或是乾乾咁吃。其中一人母親勸佢哋去買啲牛奶，但 Airbnb 創辦人卻說：「我們打算這樣硬撐下去，將來這個故事會更勵志。」

Impressive. 每次遇到困難，我相信，今日嘅痛苦，其實係可以令到未來嘅故事更加勵志。

Re Quilt 2 新顏色

今個星期有3款 Re Quilt 2 新顏色在門市率先推出，下星期會喺網上公開。有啲客人問點解我哋唔推出返舊嘅顏色，其實原因就係因為我都想有啲產品可以keep住有新，可以有新鮮感。以及例如好似啲被咁，其實每個人可能喜歡嘅顏色都唔同，好難一次過推出晒所有人都想要嘅顏色，所以每季有新顏色，其實都係我諗出來，應該係幾好嘅方法去keep住有新鮮感。

每一個時候都一定有危有機

最近有一位同是從商嘅朋友同我講，世上從來都係有危就會同時有機，關鍵係要自己把握，搵出個機會同埋努力去做。呢個我都十分同意。因為每一個年代一定會有當時認為很大的問題，例如早幾年的「COVID 疫症」，也有不少人說所有做生意的人玩完啦，經濟大蕭條，後來我們也渡過了。現在也有人說香港零售業玩完，香港國際地位受創，港人北上消費，也說香港做生意的人也玩完了。無可否認這些人的說話背後有一定的道理，但是現實是我們也要繼續努力的，不是說因為逆境實在太困難了就唔做，往往每一個時期都有自己的困難，都要面對解決，而最好嘅解決方法，就係正面面對佢。