#103 多拍片、新床單的下一階段發展、Re Pillow Co. 更進一步(19/05/2024)

#103 多拍片、新床單的下一階段發展、Re Pillow Co. 更進一步(19/05/2024)

歡迎來到本週週記!今個星期第一件事係近一兩星期我多咗拍片講解產品和工作,啲片段大家可以去https://facebook.com/repillowco https://Instagram.com/repillowco 就可以睇到喇!原因係我一直其實好想分享多啲工作嘅事同講解多啲產品比大家知,但奈何實在以往一直因為時間問題做唔到,最近發現咗一個軟件能夠用 AI 自動能夠認出廣東話並且自動出字幕,非常好用,當然亦非無認錯字但至少唔需要自己逐字逐句打出來,慳咗不少時間,因此就令我可以整多啲片(當然都需要工作上冇咁忙才做到)。如果大家有興趣睇嘅,我可能之後甚至再拍多啲工作上嘅「外景」,唔單只係一個人對住個鏡頭自言自語,不過依啲都講緊再之後嘅事,睇睇大家反應再決定。

因為畢竟時間有限,我要選擇點樣分配時間,花多咗時間喺拍片,就會少咗時間喺其他地方(產品研發、計算生產進度、採購物料、長期策劃等)。我需要為 Re Pillow Co. 做出最好嘅決定,這是我的責任。見得太多中小企業迅速彈起又慢慢衰落,我希望Re Pillow Co. 可以好啲,唔好咁快死。

新床單的下一階段發展

講起唔想公司好快衰亡,就一定要提吓新床單。我建議大家睇到呢度(如果未睇)可以去睇上一週週記,睇睇上個星期我拍嘅一段片,講點解新床單係對於我哋非常重要。因此之後我都會好極力去發展依件事,唔單只係想為公司營運,更加重要係因為我覺得呢個係一件正確嘅事,同埋呢個產品係確實可以幫到好多人。而家係要一步一步去將佢發展得更加完善。係開始做新床單嘅時候,我哋做4個尺寸6個顏色,嚟緊好快就會係9個尺寸,15款顏色。詳情我先賣個關子。但係剩係得淨色,一款物料係不足夠,我要逐步逐步將佢發展,成為一個主流選擇之一。另外上星期我哋都update左個 base,將佢做得更加好,詳情可以睇一睇網站入邊最頂頭上面Menu,會有一個News嘅一欄,裏面早幾日發佈嘅一段片就係講解依個「新版本」Base 有啲咩新同埋改良嘅地方。我好認真咁去做依件事,可能依件事係我做過最認真嘅件事,比起以前讀書考試更甚,只望可真正為香港家居帶來新選擇。

Re Pillow Co. 更進一步

以下呢一part嘅詳情就能夠喺度全部披露,但係嚟緊我哋係會有啲新嘗試。既然無法講事情詳情我就講啲其他人嘅事,都係有關於「新嘗試」。我好佩服王維基、雷軍,以及 Elon Musk。佢哋幾位都喺事業有一定成就後,本身賺返嚟嘅錢,已足夠下半生世生活無憂,但佢哋決定將啲錢倒返出去再搏一鋪,先有今日我哋見嘅 hktvmall、小米、Tesla SpaceX。喺人生規劃上是否不智我哋無法代佢本人決定,但無可否認正正佢哋將本身可供自己下半世用嘅私人財產拎出來賭一鋪係對世界好大貢獻。當然未必人人成功大把好似佢哋一樣將錢再拎出來的人係失敗而我哋亦都唔知道的。但我好欣賞同認同佢哋依一份「不願停低」、「拼了所有」嘅勇氣。人生有限,我只係一個普通人但若然我可將自己有嘅付上,盡力搏一搏,好似上面提及嘅三位我好敬佩嘅前輩,不論結果如何我覺得都係值得做,亦都係所以我寫依個無人睇嘅週記,想將過程可以紀錄分享,失敗咗之後嘅人都可引以為鑑。

本週就寫到依度!多謝大家睇到依度。