#104 收舖後的講座背後的意義、商業合作（26/05/2024）

Re Pillow Co. 收舖後的講座順利完成

今個星期第一件事就係我哋首次（亦可能係最後一次）嘅「收舖後的講座」順利完成。星期四（23/5），Mobilize Physio 物理治療師團隊來到我哋尖沙咀 iSQUARE 店，講咗一個健康講座，講講一啲都市人常見痛症同埋自我診斷、家居舒緩保健運動方法。喺店舖度舉辦活動係我一直希望做到的。畢竟租金反正已經交咗，地方亦有喺度，只要不影響日常營運，希望可以提供到更多價值（Value）比大家。因為我好想諗人嘅生命有限，無嘢找拎得走亦無嘢留得低。喺在世幾十年內，如果我一個普通人可以做到一啲事，令同樣活喺嗰個時期嘅其他人有一段愉快難忘回憶，或者有啲得著，咁就好好了，咁樣已令我人生賦予咗意義，也算今生沒枉過。在此亦感謝 Mobilize Physio 對我這計劃的支持。

商業合作

有時事情好難常盡人意。最近喺商業上多咗機會同不同公司（不同類型都有）傾計。但有時候即使盡做，有些合作實在未必能做到，要學會拒絕實在有時亦非易事。曾經喺早幾年好多來相討希望想合作嘅，基本上除非我好有意，否則基本上都係拒絕，因為覺得無需要，自己一個都也是可以，但近來我嘅心態亦有變，或許有時有啲合作都係好，只要對象係誠實、認真、正直嘅人，而我亦都覺得係大家合作得嚟，其實係可以傾傾。但雖然如此，有時當傾完之後，雙方了解更深入後，發現最終可能大家無法行到最後，個人覺得都好心痛的。今個星期正正就係有一個咁樣嘅 Case，雖然話「在商言商」，傾合作「唔包生仔」，但真正出現依個情況時，而我亦好欣賞對方時，大家發現最後可能行唔到落去，今日2024年嘅我，係有自己感到有啲失落嘅。

工作上，好多事情都係當第一次出現時，難免會情緒會受影響，但日後遇多幾次就無事了。或許日後再遇上，我就不會如此耿耿於懷了。而家回望，確實有好多嘅困難或者情況都係透過曾經遇過，就會識得應對。當然更好嘅話就係可以唔需要自己親自經歷一次，已經可以學識處理。因為咁樣會行得快好多，依方面我係睇書同埋吸收前輩經驗嗰度都仍在學習中。