#106 會展行(09/06/2024)

#106 會展行(09/06/2024)

刊出依一篇週記之時,一連四天(五、六、日、一)家居博覽 2024 過咗一半。今次係我哋第一年去參加會展嘅家居博覽,亦都未知會否日後繼續參加,一切都係要視乎成本同生意再決定。

第一日嘅家居博覽人都算多,不過入夜後就開始少人,和我開頭預期好唔同,我以為夜晚先人多。同其他有經驗參展商傾,佢哋話好多時去到56點就人少,往年去到6點幾就個個都陸續收檔啦。都係嘅,因為行得依啲展覽唔係隨意食完飯行商場,係真係有需要先會來,多數都預留一個星期六星期日下晝專心來行吧。接觸到好多完全對 Re Pillow Co. 同新床單無認識嘅人,雖然好多佢哋都係對我哋無興趣,但我還是盡可能介紹下,至少比佢哋知原來市場上有啲咁產品吧。

不過老實講真係好攰!因為除了喺檔位招呼,亦需兼顧即時管理貨存(門市、倉),亦要做埋網上查詢回覆、幫客跟進速遞送貨等,但生意又未話好好,規模未足以可以請人專門全職處理依啲幕後事情,唯有自己辛苦啲,做多啲。

第二日正宗是為「旺丁唔旺財」,畢竟星期六,無錯個場係比第一日(星期五)多人,但其實生意不是太好,不過亦好多謝有啲客人特登來探下我哋,或者不是特登來探我哋,只係經過行家居展見到我哋,純粹話買咗用緊好用,大家傾兩句,唔洗幫襯,其實已經好開心。作為一個由網上開始嘅生意,有時大家只係喺網上見到我哋,又或者上網曾經 email 傾過兩句,大家能夠有機會見下,那怕只係經過講句「用緊!加油!」,其實都已經好好。因為當面對緊更多市民大眾時,我今日企喺檔位出面通道 ,嘗試去介紹「新床單」比更多人認識,但講到聲沙,將使用示範重複一次又一次表演出來,有時路過嘅人亦都係無動於衷,又或者即使係覺得「咦唔錯喎個concept」但都係「我哋再睇下先」,有時難免覺得心灰意冷,但喺依啲時候有啲以前嘅客人來到見到講兩句加油,實在真係好鼓舞,頓時覺得自己唔係孤單,因此真係好多謝每一位今日過嚟嘅,感謝你哋今日經過同我打個招呼同打氣嘅一兩句,人有時要嘅嘢好簡單,一句加油已經會令我即刻精神鼓舞。

家居博覽已經過咗一半,聽日係第三日星期日,如果睇緊嘅你係星期日見到,仲可以再有機會過來嘅話,過嚟打個招呼傾吓偈吖!希望可以見到你。

亦都感謝讀緊呢篇週記嘅你嘅支持,唔知道依篇係你第 篇睇到嘅週記抑或第 100 篇,多謝。