#105 機會與風險（02/06/2024）

歡迎來到本週週記！又來到每個星期依個時候，同大家講講今個星期嘅事。最近幾個星期都甚忙，有時忙唔係可能因為好多人以為嘩一定生意好，而係有時想準備定一啲未來長遠啲嘅計劃，可能係半年、一年後嘅事，我想準備定一啲。從商一段時間，學識任何事不能臨急抱佛腳，即使比你成功過到一次亦不能一世靠最後一刻抱佛腳去達成，長遠而言，你都係需要預早準備，完善計劃去達到各項目標。始終成功當然也有運氣成份，但背後還是需要堅實功夫支持。因此依家學會要準備，為未來嘅事去計劃，因為過去確實喺依方面係做得唔夠好的，雖然未必有人知但我自己知，希望日後可會有進步。

今個星期想特別啲，講一啲自己面臨緊嘅嘢...... 咁到底係咩？

最近喺度努力嘗試為 Re Pillow Co. 製造機會。係！我知道，可能睇緊依篇週記嘅你，可能覺得我哋都做得唔錯吖，產品又多人喜歡，啲客又常常幫我哋介紹比朋友，應該無咩困難，要特別為自己製造機會吧。但事實其實並非如此，我哋係有困難而無可否認嘅係，確實雖然你認識依一個牌子，但好多好多人其實係唔認識我哋。

我哋仍未係打入到主流之一。甚至知名度係10名以外。如果你留意咗 Re Pillow Co. 一段時間，或者你都會知道我真係好想好想可以做好佢，我並非一個想點做大公司賺大錢嘅人，但我真心覺得依一行業係可以有人做啲嘢做好件事，我不求人人揀 Re Pillow Co. 產品依個亦都唔現實但我想至少你可以知道香港有人做緊一樣咁嘅事，為床上用品而努力，比到你有多一個選擇。可能我最終結業收場（大家都知，近年香港好多舖頭結業），但我至少有試。

因此最近喺度洽談一啲商業合作，其實都係想比到 Re Pillow Co. 希望更打入主流嘅機會，但 it's so scary man，我好驚，好驚係做錯決定會血本無歸。我記得第一次開太古城 pop up store 時，我都一樣好驚，當然依家諗返開立一間門市係一個正確決定，但當時我係好怕的。又或者畢業一刻我向本身已簽約之一流律師樓請辭，係好驚的。同樣依家當我要做一個好 out of comfort zone 嘅決定，實在都有驚嘅時候，甚至牽涉同樣銀碼，現時比以前更驚，因為以前唔識驚，依家睇返轉頭，以前以為自己掂其實好多嘢都唔識。依家做決定，比以前小心得多了，但當然，可能一年之後再睇轉頭，都係會覺得今日自己實在都係唔得，都係唔夠叻。

Fear 係驚，係情緒，係無法幫助事情的。面對機會和風險，要以極理性態度去嘗試計算成敗可能去做決定，以及如果 worst case scenario 自己能否承擔後果。實際係咩機會事情，風險有幾大實在無法喺度講，因為依啲真係秘密了，但係的，依個禮拜就係諗緊依啲事。