#108 新床單已達到穩定供應，然後......（23/06/2024）

Hello 大家好，歡迎又來到本週週記！初初第一次來到閱讀週記嘅你，放心！你無睇錯，真係週記。你上一次聽到週記依個 Term 係幾時？如果你同大部份人一樣，應該係小學時期吧！無錯，我將小學時期嘅週記 Concept 重新「復活」，帶來了商業世界。Re Pillow Co. 係我心血，不論有無人想睇，我都想可以將工作嘅事紀錄落嚟，因為日後睇返轉頭，我諗會好有意義，會見證到自己一步一步嘅成長。當然，亦有可能會失敗，咁到時依啲週記亦可以幫到人睇到點解失敗，希望之後嘅人可以避免犯同樣錯誤，條路可以行得順暢一啲。

今個星期想講一啲比較認真嘅 Topic，係關於自己過去半年觀察到嘅經驗分享，唔係啲咩大道理，純粹小許工作反思。話說喺過去十年，其實好多世界各地如同 Re Pillow Co. 一類嘅小型 Start-up 隨著網絡世界而誕生，在各行各業都有，例如較出名嘅有 Rent the Runway、AWAY Luggage、Allbirds Shoes、Warby Parker、Ridge Wallet、Cuts Clothing、Casper Mattress、Dollar Shave Club 等，佢哋都係一啲 D2C（Direct-to-consumer）嘅 Internet Company，即係以網絡為銷售同宣傳，客人直接會喺佢哋網站落單，而佢哋會直接寄貨比個客人，中間不經其他公司（例如百貨公司、品牌代理等），依啲公司多數會以「We've cut the middleman」，即是不經中間人自居，因此可以比到客人以更低成本，買到更優質嘅貨品。而到底依個說法係唔係真，是否真係有依個效果呢其實並唔係咁簡單，有機會喺合適嘅場合再分享。不過當中佢哋都好多生意去到一個位有少少開始會停住咗，好似增長唔到上去咁，因此喺過去一年經濟市場上開始有啲討論話會否依家已經去到一個時代係見到 D2C Brands 嘅衰落同完結。作為一個同樣是為 D2C 嘅品牌，我當然身歷其中好明白當中嘅情況，10年前，D2C Brands 開始興起時，好似比咗消費者一個好美好嘅畫面，但事情唔係咁簡單。頭先上面例舉嘅有部分公司，曾經意氣風發，成為市值過十億美金嘅品牌（Billion Dollar Brand），但有啲估值都從高峯跌咗九成，甚至面對破產邊緣，當中其實有啲問題。

我信 History repeats itself（歷史不斷重演），人生日子有限，有好多錯誤其實前人行錯過，但日後嘅人又蠢豬豬咁唔知又行多次，咁就實在有啲浪費時間同可惜。當然時代會變化，但好多道理其實都一樣，因此可以嘅應要多啲去謙虛聽之前嘅人嘅說話（最好係佢係能夠做到你心目中嘅「成功」，做到你想做到嘅目標），記錄低其實都可以避免好多錯。對於 Re Pillow Co. 來講，我只係想繼續做好自己，務實慢慢一步一步咁前進。不求如同上面提到嘅公司要做到幾大幾勁，只求腳踏實地做實業，做好自己，持續進步。我覺得依個係一個正確嘅方向同態度。

最近友人 Send 來，話某間我好鍾意嘅火鍋店逐一逐一分店執笠結業。有啲人冷嘲熱諷話佢價錢貴，以前早幾年賺到笑，現在執笠是「抵死」，我雖不知道亦不認識該火鍋店老闆，但我諗做生意執笠結業其實唔係咩開心事，佢都有父母家人，甚至有仔女要依靠佢，再加上佢亦有請同事伙記，都係貢獻緊社會。有時人哋都係做間 火鍋店，正當生意，即使定價貴亦係明買賣，有人願意比錢就好，點解要咁樣話人呢。有時我見到會覺得好可惜...... 最緊要是執笠時，負好老闆應盡的責任，數要還清，同事人工付清。不過當然別人嘅事我亦無謂評論，事情有時太複雜我唔識講亦都無資格講。

其實經濟唔好就係既定事實，大家都係受害者。有時大家可以嘅話，少啲冷嘲熱諷，有時多啲體諒明白，大家都喺依個城市生活，環境唔好，Dup低頭努力啲默默做，咁咪好啦，無謂再踩人兩腳。