#109 給未來的自己（30/06/2024）

來到上半年最後一日，想寫一啲小總結但又唔知點寫好，因此就諗不如寫一啲自己想比下半年或者下一年嘅自己睇，好似寫一封信比未來嘅自己咁，總結一啲自己行呢條路學識嘅嘢，提醒之後嘅自己：

未來的你，你好！唔知道依家你生活過得好唔好？唔知道 Re Pillow Co. 執咗笠未？請諒我比較直接，因為喺過去依刻嘅你最近有個朋友 Eddie 同你講，Start Up 有九成都係頭五年執笠，而最近依期香港都好興講「執笠」，甚至 Facebook 有啲叫「執笠關注組」等網民自發嘅群組，搜羅一啲自己見到嘅執笠舖再影相放上網，成為城中熱話。喺「執笠潮」同「Start Up 九成都執」之下，問你有冇執並非想點，純粹我都知啲嘢唔易，可能真係會執都唔出奇。如果真係嘅話，我唯一想嘅就係你唔好太上心，我知你會但你盡量試吓睇開啲，無咩大不了的，我諗你已經盡咗力，你一定會，若然都係救唔到 Re Pillow Co. 的話就無計啦，去搵份工安穩過日子。

知道你一直都好想有穩定安康嘅生活，雖然鍾意自己做嘅嘢但有時都想放鬆下。不知道你今日可以得到依啲生活嗎？工作仍然係自己一個分擔多角？定可以有人幫到手？我知道你常常覺得怕交比人做會做得唔好，再加上公司資源原因，夾硬攬哂上身硬食，年輕就可以，但你都知自己身體長遠頂唔到落去，要識得攞到一個比較可持續發展嘅 workload，同埋你緊記都需要有啲空間騰出嚟先有時間做啲長遠嘅事。另外，忙還忙，唔好忙到忘記陪身邊嘅人，你知道，每一個人生命都有限，唔好去到太遲，無法返轉頭時，先比佢哋知你原來愛佢哋。幸福會掠過，愛得要及時。

另外，生意上落乃平常事，盡量唔好喺淡時太過唔開心，自己要識得平衡心理。無咩大不了的，生意梗有上有落，記唔記得你好鍾意睇前一田 CEO 莊偉忠嘅書？佢寫過，地球有地心吸力嫁嘛，邊有生意齋上唔落，梗會有上落。落嘅時候，心情唔好太唔開心，令到身邊嘅人都為你擔心，男人嚟嫁嘛。Be a strong man. 繼續努力總有人見到。當然你都知，勤力只係基本，盡量做吧。

太多仔細實務嘅事我唔知你面對緊嘅困難問題同情況，因此就唔評論太多啦。我亦唔會比啲過於正面/過於負面嘅建議，你憑自己本心去做就可以，無論最後如何，加油。2024年中嘅你支持你。

過去的你

30/06/2024