#110 新網站設計、紡織學校上堂、產品改良、加多一間門店的可能（07/07/2024）

歡迎大家來到本週週記！今個星期有好多不同事情同發展，但有啲忙碌，因此在此簡述。

新網站設計

喺過去大約一星期，如果係一啲舊客戶應該有留意到，網站有所 UPDATE，今個星期整個網站操作係無變的，但樣子係有所 UPDATE，在手機上面睇嘅頂頭 Main Menu 開出來嘅動畫效果確實係唔錯，至於為何要有改動其實係因為我覺得之前嘅網站唔夠好睇，可以再好啲，咁先似一個新時代，好睇靚仔嘅品牌。或者，簡單啲講，我自己手痕。

不過唔改由自可，一改就出現好多問題，有客人落唔到單，有客人結帳時彈來彈去無法付款，有客人加咗產品落購物車，但開出來一片空白唔見哂，如此種種，令我好頭痛苦惱，亦都極為忙碌。因為要了解每一個情況點解出現，客人用咩機咩系統點情況撳出來會有問題其實係一啲好複雜嘅問題，但一定要了解哂依啲資料先可以對症下藥解決問題。但如果因為個客人遇到問題可能心情已經不是太好，如果你再問個客太多問題可能佢會唔耐煩甚至有啲燥，佢係來買嘢而不是來幫手解決網站問題的。因此依啲情況我都係盡快比到方法幫客人落咗單先，之後再憑自己理解搵出問題所在，熄咗一啲 Code 逐樣試去解決問題。

紡織學校上堂、產品改良

今個星期我亦都去咗九龍灣製衣業訓練局上堂進修，其實任何範疇都有入面好深奧嘅知識，係可以不斷鑽研學習。我好相信提升自己 Re Pillow Co. 嘅技術係關鍵。好多公司可能一時興起但又好快無法繼續經營競爭落去，其中一個原因係技術唔夠。喺同其他公司比較下，自己如果技術水平只係同其他公司差唔多，做出來嘅產品都會差唔多，咁到時就大家只係鬥平，或者鬥賣明星代言，無意思的，亦都幫唔到個消費者改善生活同帶動整體行業進步，因為大家都係停留喺同一個技術水平層次。一定要有人去行多步，雖然係難亦都會係辛苦，但總有人要去試下做啲唔同嘅嘢，去推動行業進步。Re Pillow Co. 就係一直做緊依啲事，由初初做一個可以調節枕頭開始，你可以話個概念好簡單都唔算得咩發明，但最重要係有人行出來做啲咁嘅事，再去到新床單...... 我哋一直都係默默地做緊依件事。而去製衣業訓練局進修，係因為我想再進一步改善產品，有時要去做好一件事，唔單止需要一個 IDEA，亦需要好多該事情範疇嘅知識，先會諗到點樣做。大家可以期待，產品會繼續進步。

加多一間門店的可能

另，幾個星期前嘅週記曾經提過會想慢慢輕輕擴大規模，當中其中一事就係有機會想加多一間門市。事情相信係會成事的。地點先喺度賣個關子！之後再講。