#115 在最壞的情況見證自己最真實一面（11/08/2024）

圖：在準備將軍澳新店的裝修。

最近工作上有啲遇到大大小小嘅問題（我嘗試寫得具體一啲，唔想就咁一句「工作忙」就算），但依啲問題我個人覺得都係好的，都係一啲迫自己改善進步同埋考驗自己能力嘅問題。「從商」教識我嘅係一間公司喺每一個階段都會遇到一啲新嘅問題，而我嘅任務就係喺背後將佢哋一一，不著痕跡咁去解決哂。因為每日都要打開門口做生意，是不能夠話：「我依家面臨一個咁嘅問題，好煩好多嘢做，我一個人搞唔掂但又未有錢請多個人幫手，可唔可以停一停比啲時間我」喺現實世界，咁樣是不能的，每個人都有自己面對嘅問題同煩惱，即使幾辛苦大壓力，我嘅責任同每一個人一樣，都係要盡返好自己責任，要做都要做，好多嘢做都唔係藉口。

而且其實現時面臨嘅情況都係好嘅，係考驗係迫自己帶領 Re Pillow Co. 去解決問題，並且希望日後嘅路可以行得順啲。一間公司喺每一個階段都會遇到一啲新嘅問題，如果唔遇到新問題就唔好了，代表你沒有進步，沒有郁過，做來做去都係咁，其實仲令人擔心。我常常有一個諗法，其實每一個人人生都有一定份量嘅辛苦同艱難要承受，早啲承受，總好過遲啲。我記得我爸爸（我甚少提及家父教悔，但人大咗，確實覺得佢教咗我好多好啱嘅道理）曾經講過：有啲人會年輕時行一條辛苦啲嘅路，但大咗之後條路就會輕鬆啲。倒返轉亦有啲人年輕時去咗玩，大咗行嘅路就辛苦。

我知道依個講唔出咩大道理，但我諗我開始有啲明白。因此我願意。問題、困難，掉埋嚟啦！我會沉著應戰，逐一解決。

另外，喺遇到問題、困難時，依啲最壞最差最危急之時，其實最能夠測試到自己最真實嘅一面。 中文嗰句「患難見真情」就係講朋友之間嘅友情，喺困難嘅時刻嗰度可以體驗到有幾真實。而我自己覺得喺從商時，你遇到迫在眉睫，可能大大影響公司收入甚至同事出糧問題時，你會如何去做決定，就更加顯出你最真實重視啲咩嘅一面。

我常覺得，有時喺街上社會上我哋一聽到人哋講「商人」，好似普遍形象都有啲負面的，我覺得我哋作為從商嘅真係要好好反思一下。

睇緊依度嘅你，好多謝你睇依個，越寫得耐，就越來越少人睇嘅週記。一路跑一路跑，即使跑道上剩下嘅人唔多，沒有以往的風光盛世，但我還是繼續默默地跑。

我只係一個好普通嘅人，多謝你來睇我嘅週記，記錄低我依條路嘅每一步，亦更多謝你嘅支持。