#116 未來（18/08/2024）

Hello 大家好！又嚟到一週靜落嚟寫下嘢嘅時候，講下今個星期嘅事。

紀錄及管理貨存（進階版）

最近開始慢慢去到要學習貨存管理，都想寫下記錄下。以往其實做嘅貨存管理都係非常基本「初級班」嘅貨存管理 —— 即係盡量唔好斷貨，但直到半年前左右，依個「盡量唔好斷貨」背後係無任何統一規矩去點做的，總之就係無啲咩就補啲咩，稍為有啲係缺乏一套完善方法去做周衡量補貨密度和數量。現在依一個月起，會嘗試更加有啲數字有啲跟據咁樣去 keep stock，例如要跟返平均每月銷量等嘅方法去做，認真咁用 Excel 去做。

憑最好的心去做

今日是 2024 年 8 月 17 日，Re Pillow Co. 仍是一個無咩人識無咩影響力嘅小蚊型品牌。我亦只係一個好普通嘅人，喺整過做Re Pillow Co. 過程中到到依一刻，亦有好多懷疑自己、唔知點好嘅時候。我知道如果有日如果規模可能大啲，可能會有人會唔鍾意我，會可能會有更多更多嘅挑戰，會有更多好難過、患得患失嘅晚上。我知道我可能憑最好的心去做，可能都未必做到，可能最後都係失敗收場。但喺所有依啲事情發生之前，我想喺度同大家講我會憑最善良、最好嘅心去做，當係大家一齊試一次。

創業就像拍拖結婚

如果問我回望過去幾年，我覺得創業其實就似拍拖結婚。一開始，你其實是不認識依個人，你唔知道佢是否一個好男人/好女人，但你都照去認識佢，於是乎一路行一路行，當中當然會有磨擦亦都有好多突發、唔預計過嘅事情發生要去解決，是不斷去學習摸索行落去，依一切一切其實你唔洗喺創業之前預早擔心定的，因為根本無得諗無得預算，事情有時唔洗諗得太複雜。亦都有可能，即使你憑住最好嘅心，可能亦都無法修成正果，依個係有可能的。因此記住「諜事在人，成事在天」，盡力去做，憑最好嘅心去做，但學識從容面對一切就好。

將軍澳東港城交收鎖匙

今個星期我亦都和將軍澳東港城管理處交收咗鎖匙，正式開始店舖裝修工作。如果一切順利，暫時預計9月下旬開幕。