#119 寫得有啲長的週記（08/09/2024）

Hello 歡迎大家來到本週週記！今個星期做咗啲咩？

與另一初創 Start Up 見面

首先今個星期二，因受邀約，與香港一間睡眠眼罩的初創創辦人見面傾談。喺工作上同不同人傾談見面就係都常有嘅事，但係甚少有機會會同一啲年紀會比較相近嘅人去傾談。依位創辦人30歲，同我26都唔係差太遠，感覺上大家好似年紀相近，又係做睡眠相關行業，感覺比較親切。

新被袋

另一個今個星期做嘅嘢就係「新被袋」，當新床單開始慢慢有人使用的時候，亦都有唔同嘅客人，希望我哋可以推出埋被袋，可以整件事就完整，即是，有枕頭有被子，然後有齊包住佢嘅枕頭袋、床單、同埋被袋，成個睡房就完整哂。依個被袋點解我哋一直以來都未做，係因為我哋都係想做一個新設計嘅被袋 —— 我要先解說一下，依度我意思，並唔係要將一件冇問題嘅事情夾硬要改變佢，玩「花臣」，亦都即係英文上嘅 Reinvent the wheel（直譯：「重新發明車轆」，即係夾硬將一個好地地冇問題嘅事物夾硬要改佢）。我覺得被袋本身係有需要改善的地方，畢竟其實你可以話我懶，我亦都知道有其他方法例如反轉咗個被袋先換完之後再反番，但本身換被袋依件事情，其實都唔係真係咁容易，尤其因為要揚開佢，又要喺咁大個被袋做到被袋被芯角對角邊對邊，唔係咁容易。

新被袋，會出的，有望年底之前推出。This is just great.

打風的一件事

話說今個星期四晚8號風球，直至星期五中午才落下。星期四晚大約6點，同事拎咗一張深藍色香港地圖床單測試品去公司附近嘅葵涌光輝圍 365 Laundry 自助洗衣店試試使用乾衣機效果，但由於同事錯手撳咗接近兩個鐘高溫烘乾程序，時間太長，八號風球亦都將至，如果等埋完成會返唔到屋企，因此就走咗先，諗住聽日一落風球去拎返，只是隔一晚，依啲嘢應該無人會拎走你。

但今日風球一落，回去洗衣店時，床單已經唔見咗，恰好有職員在場，問咗佢，佢展示咗一個放遺失衣物嘅位置，見到有其他衣物無人認領，但搵唔到依張地圖床單...... 因此應已丟失，冇辦法，唯有下次再做測試吧，雖然都覺得有啲可惜，因為依件產品其實未推出，但係咁樣就唔見咗了…… 亦都下次遇到相同事情，實在千其唔能夠放喺公共地方太耐，有機會真係會唔見。

最近睇緊的兩本書

最近我睇緊兩本書，第一本係 Onward by Howard Schultz，係講 Starbucks 在 2007-2011 當時係生意谷底，人人睇死佢哋就嚟要執笠嘅時候如何掙扎求存，並且扭轉劣勢嘅故事，第二本係《永不放棄：我如何打造麥當勞王國》（雷·克洛克著），係講佢自己如何打造麥當勞整個漢堡包快餐連鎖王國嘅故事。

呢兩本書都係由公司嘅老闆自己寫返公司嘅故事，亦都係近來睇過其中兩本自己最鍾意嘅書。

詳細冇辦法在此將我嘅睇書筆記寫晒出來，但我在此就講一講 Starbucks 嗰本，因為嗰本我自己感受好深，亦都已經睇晒，麥當勞嗰本暫時未睇完就唔講住。

Onward by Howard Schultz 書寫嘅背景係2007-2011，當時Starbucks 生意、股價都係低潮，Howard Schultz 作為公司老細，佢面臨嘅問題簡直係長到寫唔完：經濟差咗啲人唔去買咖啡、分店增加難以確保客人在 Starbucks 體驗、公司規模大咖啡水準難以控制、客人投訴 Starbucks 唔再同以前一樣、新競爭者（McCafe）加入市場以更低價格搶佔市場份額、Starbucks出嘅新飲品不受歡迎、生意連續每季都差過去年同期…… 依本書就係 Howard Schultz 喺 2012 年寫返佢如何喺依段時間捱過去，點樣逐樣逐樣事情改善，點樣提振公司上下嘅士氣…… 當然最重要就係最後點樣令到公司再次扭轉劣勢獲得盈利，成功渡過難關。

從字裏行間，真係會睇到 Howard Schultz 佢對自己嘅Starbucks 嘅真誠熱愛同上心。其實依一種我會稱之為「真誠熱愛」，喺好多公司老細自己寫嘅書都會見到，Dyson 嘅 James Dyson、小米嘅雷軍、McDonalds 嘅 Ray Kroc、Airbnb 嘅 Brian Chesky…… 依度我唔再寫落去但你明白我意思。所以當我同其他嘅公司可能傾嘢或者見面嘅時候，係睇察言觀色嘅時候，同樣其實你會睇到究竟佢係咪真係有依種「真誠熱愛」，你會feel到佢心入邊係咪真係有一啲可能更加遠大目標想去透過公司去做到，或者當佢講嗰啲產品/服務嘅時候，你會feel到佢係咪有一種熱誠同熱愛喺入面。當然我相信有時候人都會攰，佢未必可能見面嘅時候會show到俾你睇，但係我覺得睇人寫嘅文字你會feel到。真誠熱愛。

依個世界我哋其實係需要更多依啲人。因為依啲人會不斷進步，會不斷為世界帶來更好更佳些品/服務/App…… 我是好敬佩亦好感謝佢哋。雖然 Re Pillow Co. 是一個完全唔可比嘅規模，只係我一個𡃁仔喺度玩，泥沙，亦老實講暫時未對世界有啲咩大貢獻，但係我係真心好敬佩嘅人，亦都我睇到佢哋嘅犧牲同埋嘅心。因為搵錢有好多方法，佢哋揀嘅方法係嘗試用自己嘅公司去改善人嘅生活，而且唔係做一啲非常貴價，冇人用到嘅產品（例如奢侈品），亦都唔係隨便做啲其他人都做緊嘅事，而係真係擺個心入去去做好件事，但願我都有勇氣可以嘗試做到。