嚟到 2024 年尾，今年遇到唔同人唔同事，雖然好似做咗好多，但亦有好多委屈同困難係無法宣之以口。但講一啲唔開心嘅事亦都無法改變事實，嚟到年尾，雖然我只係一個好普通嘅人，都想寫少少關於今年學到嘅嘢，如果睇落又順眼幫到手嘅，咁就好啦，希望可以幫到大家。
1. 有時我哋睇嘢無法睇到事情嘅全部，因此盡量避免太快就對事情落定論。舉例你見到有位年輕人公園食煙，或許大部份人見到會認為：「嘩！好差喎。」但可能我哋唔知道嘅係佢以前係食白粉，現在改咗食煙仔，嘗試逐漸搣甩毒癮…… 日後想連煙都唔食。其實佢喺度進步緊，只係需要時間和過程。如果可以，嘗試唔好咁快一口咬定人，因為可能背後有好多我哋唔知道嘅事同佢嘅困難。同樣我們每個人都有自己面對嘅困難同問題，做人有時寬容一啲，或許對事情會有唔同睇法。
2. 做好自己未必有回報，亦都儘管你如何努力憑最好嘅心去做，亦未必人人會欣賞。如果係咁，我想講兩樣嘢：第一，我相信你，我支持你。如果你有唔開心有心事，要搵人傾下唔好自己收埋，如果你唔介意都可以 message Re Pillow，我哋雖然唔識，但我會覆你，我會支持你。如果我忙緊或者開緊會等我之後都會覆返的。唔開心唔好自己谷埋唔好諗埋一邊。第二，比較現實係要明白依個係無可避免，個個都要經歷依個過程，唯有耷低頭，不斷努力，希望做出成績，你嘅困難，有日其他人會明白。
3. 以前其他人未試過/失敗咗嘅路，唔代表你一定唔得。每一個時代嘅背景同環境都唔同，而你有嘅能力亦都同以前嘅人未必一樣，可能以前嘅人做開有佢嘅方法，但唔代表你諗嘅新方法唔 WORK。因此我覺得佢哋係唔應該批評你的，你要相信自己。其他人以前做唔到唔代表你做唔到，更重要係依刻嘅你未做到，但咁唔代表日後嘅你做唔到，因為你會改善，你會進步。加油。
4. 再忙都要記得身邊嘅人，比時間陪下人哋，仲有陪人嘅時候唔好諗住自己嘅工作。愛依樣嘢好特別，係要及時的。錯過咗，錯失咗，或者失去咗，到時想彌補亦都可能冇辦法。我諗大家明白因此亦無需再解。
以上係少少自己今年 2024 嘅得著，如果幫到手/有啲少許啟發，我都會好開心。第二點當中講嘅係真嘅，雖然我唔係專業傾心事專員，亦都有時可能工作忙或者開會做緊嘢等覆唔到快，但如果你真係有啲嘢唔開心屈住又搵唔到人講，你唔介意搵我我會覆你，我會支持你。大家雖然唔認識但生活喺同一個香港，互相支持下都好。我都知有啲人覺得我講依啲咩 2024 學到嘅道理好奇怪，但我係真心嘅。希望以上幫到你。
#133 新庫存管理系統、數據分析與過度分析（22/12/2024）