#133 新庫存管理系統、數據分析與過度分析

歡迎大家再次嚟到我嘅週記，2024 喺混亂繁忙中渡過，嚟到 12 月，今個月睇到我幾次週記都講關於一啲庫存管理系統同埋將工作漸漸系統化，以及交放同事，是源於 11 月底與一位前輩講過電話後，覺得實在要開始 off hand 日常營運，亦得到同事好好地去幫助推行，開始「的起心肝」去做此事。

當然執行上一定會需要一啲時間去大家適應，然後轉接期間一定係痛苦，但依件事情，長遠營運係必須要面對亦都要去解決，呢個係令到公司嘅 Operation 可以更加 efficient，我覺得係必須的，尤其當行順咗之後，時間就可以騰出嚟做一啲更加重要嘅事。

例如好似早一兩個星期都提過嘅庫存管理系統，今個星期算係比較完整地執行，並且去日常使用，當中有啲細節位行執行都未至於最好，可能當中同事亦都仲有啲混淆唔清晰，但係都逐漸理順。對於客人嚟講，咁樣係令到購買時候，可以隨時在舖頭更大機會買到自己想要嘅顏色尺寸，亦都即使如果冇，同事都可以清晰咁話到比佢知邊間舖頭仍然有貨或者可能幾時可以將貨轉過嚟這裏俾佢拎，個購物體驗可以更加好。

確實喺我哋增加不同產品款式嘅同時，一個不容忽視嘅係，背後需要管理200-300樣不同的貨品，實在係具挑戰性，尤其對於我冇經驗嘅初踏入商場嘅「細路」，可以話係急速迫自己成長之旅。

如果今次呢個電子嘅庫存管理系統係成功推行，我會節省左自己好多時間，因為今年係以極度混亂和沒有系統方法去處理依啲貨存問題。

數據分析與過度分析

好多時經常你會聽到不同的公司管理層嘗試使用數據分析銷售情況，從而去了解到底生意情況的升跌，然後作出相應商業決定。依個確實係一個需要做嘅做法，但過度嘅分析亦都不是理想的。有時很多事情，可能很多細節原因係我們不知道的，因此如果過度沉迷於分析數據，未必能夠睇到全局，反而可能會做錯決定，亦浪費時間。

我好喜歡研究不同公司嘅故事，不論成功失敗或者從其他公司歷史中嘅教訓，雖然冇可能話完美，但都可以盡量避免自己犯同樣嘅錯誤，將自己做得更好。

有時我都會心急，但心急好多時就係令到公司失敗嘅原因。成功嘅企業都係一步一步去做，過程並不會停，亦都唔會自滿，但同樣不會太過心急而冒險，以穩固為首，再逐步進步。因此要做好現在先，一步一步做。