#136 Costco 的 Code of Ethics

今個星期想唔同啲，寫下啲商業心得。話說其實從商時，好多人覺得做事一定要有自信，要信自己做嘅決定去執行就會成功。我唔係咁睇。我常常相信如果事情要做得好，一定要學識唔好咁有自信，唔好一口咬定覺得事情一定係咁咁咁，多啲研究同學習前人做嘅事，人哋錯過嘅就唔好再錯多次，人哋做得好嘅，就要領略然後去套用喺自己嘅工作上。最近研究關於 COSTCO 公司嘅故事，當中最深刻嘅係提到佢哋公司有四大做事嘅原則（COSTCO Code of Ethics），深受啟發，以下我先寫出嚟佢哋做事原則係咩：

(1) obey the law（遵守法例）

(2) take care of our members（照顧客人）

(3) take care of our employees（照顧員工） and

(4) respect our suppliers（尊重供應商）

以上四點係分先後次序的。

我睇到呢度嘅時候第一時間係諗到自己嘅工作。其實依個正正就係我想做嘅嘢：照顧到客人、照顧自己員工、另外尊重有份貢獻於製作產品嘅每一位。

有時喺商業世界會遇到好多我會稱之為「唔好嘅人」，佢哋並非大奸大惡，但只係好多時候思考嘅方式都係從自己角度出發嘗試為自己謀求最多嘅利益，自私地只係諗自己，諗點樣可以透過生意令到自己獲利而唔顧及是否自己真係比到好嘅嘢對方或者其他接觸佢嘅人 。最緊要係要自己喺從中得到利益。當然，冇話係啱定錯，但我自己就唔係太想咁樣做 。想做一個點樣嘅人，想活出一個點樣嘅人生，從來都係自己決定 。但係我自己個人嘅睇法係呢個世界實在已經太多只係諗自己嘅人，其實如果大家多啲從大局去睇一啲事情，世界會唔一樣 。be a good human being. 去先為其他人諗，咁先係大智慧。

因此我好欣賞一啲公司或者一啲人（其實公司背後都係人，一間公司做某啲決定都係因為背後嘅人做嗰啲決定）佢哋願意做事多啲從其他人角度出發，為客人謀求最好嘅利益，亦都同時間照顧好自己嘅同事，等自己嘅同事可以有安穩嘅生活 。留意你唔係話照顧好公司嘅股東，唔係為咗盈利就做出任何事，而係先照顧好自己嘅受眾，自己嘅客人 。因為如果客人喜歡你嘅產品，其實先可以長遠 。如果一尾追求短期的利潤，好難行得長久 。當然都係一個平衡，明白有時候好多公司都經營有困難，如果不夠利潤自己下個月就要執笠了，因此到最後都係平衛。

但出發點嘅心態唔同，做出嚟嘅決定真係唔同。而於我而言，我好同意做事一定要從客角度出發先。依個亦都係我覺得可以繼續做落去嘅原因。心入面有個願景去實踐，先可以行得耐。