（由於臨近年尾，加上 SALE 進行，最近工作繁忙 。這篇周記是遲了數天補寫的 。遲了，但從不缺席）今個星期剛剛進行了一年一度 BLACKOUT SALE，因而工作比較忙。這段時間之中，要去管理貨存，出貨，也要同時進行各樣 UPDATE，工作甚忙 。但一年一次，無問題的 。年輕時唔辛苦啲唔合理，更何況我覺得慢慢自己年紀已經越來越接近30（仲有幾年），我覺得我已經不是初畢業嘅細路了…… 有更多更年輕嘅後生喺後面，慢慢更感到自己的人生亦都會過得好快，轉眼一生 。因此自己要把握機會努力 。
勤力嘅工作係必須的。我覺得社會上實在太多人仍把握住覺得可以以以前方法去做事，覺得「咁就夠」，事實上距離自己能力範圍嘅限制仲差好遠。我不會怪人可能屋企有小朋友或者家人等有時無法完全「瞓身」落去為工作搏盡，但我覺得大部份人仍距離自己可以兼顧到家庭生活之外，可以實際達到嘅限制好遠 。例如佢能力可以做到90，因為佢想陪多啲家中嘅小朋友或者其他自己嘅私人生活，因此佢只係做到80 ，呢個我覺得是可以明白理解的，但係個問題係好多時候人只係做到60 。我覺得咁樣係唔好的 —— 現實係我們需要除咗為自己家人負責任，亦都係需要為自己嘅客人負責任 。因為我哋比佢嘅產品，係會影響他人嘅生活，因此我哋應該要做到更好，要更加搏盡。其實我知道我搏盡只有我自己一個知道（其實想起來也有我的同事和客人知道，在此都好感謝有啲客人有時候好關心我有沒有足夠休息），但我覺得咁樣係人生嘅意義，我常常諗起突破的火柴人：燃燒自己，成就他人 。
當然，唔好講到自己好偉大，我也是都要收錢的 。
而且理念雖好，做嘅產品都要夠好，同事幫忙，確保服務體驗等等全部都好重要。仲需要學識如何計數，管理公司，收支平衡，先唔好講盈利，但至少要唔好根本維持唔到落去而導致執笠，咁先可以講長遠，咁先可以燃燒到自己同埋能夠貢獻到呢個世界 。不能夠話自己理念同有最好嘅心去做依件事，就可以乜都唔理。
現實係，有時候冇人會理會你背後嘅努力同一片嘅最好嘅心，因為事實上有很多商人欺騙過你和我的信任，我們信過佢哋，但我們受騙，我們漸漸學會盡量不要相信別人 。因此我覺得，是要必須喺所有方面去做好，先吸引佢過來，然之後慢慢可能其他人先會明白，最終慢慢越來越認同和支持 。而且初初起步很多時候開頭未必能夠做好，因此都係一步一步去進步改善，希望他日回頭再睇返呢篇文，會覺得一切努力都係值得 。
#136 Costco 的 Code of Ethics（12/01/2025）
#138 苦惱（26/01/2025）