#161 屯門市廣場新 Pop-up（06/07/2025）

最近忙到甩轆，原因係籌備緊一間 Pop-Up 下個禮拜喺屯門市廣場開，雖然佢係一間短租嘅 Pop-Up 但佢都係一個入舖嘅舖位，因此有一定面積比較多零碎嘢去搞，有少少令到有啲產品嘅嘢有啲拖延咗或者 progress 唔夠快，有時都好鬼怪責自己，但幸好間舖嘅嘢已經去到尾聲，下個星期就開，到時再返返處理其他事。

相信好多人都會想知道屯門 Pop-Up 會 Pop 到幾時，喺度我同大家分享下少少，其實好多時依類商場嘅 pop-up 係睇生意額，如果生意額好就會可以留低做落去，如果唔好其實商場咁上下會明示暗示，或者你自己醒目都要識做自己起身，要人開口就好醜怪。至於依個位我哋初步預會做大半年，到到下年2/3月，再做唔做到落去就睇情況，暫時講唔定，平常心啦。

我其實唔太鍾意講啲咩要開到全港都有舖嗰啲講出嚟自己都尷尬嘅事，只係常懷一個普通人嘅心，如果搵到相宜租金地方開舖可以方便到我哋自己嘅客去體驗產品又可以更有效率將產品送到個客手上，中間盡可能減少消耗（所以我陸續減少緊百貨合作，不過又係另一長故事），令啲錢係真正落落個產品度，減少中間浪費，質素可以好而客人會受益，自己用得好時就會自然介紹人，令當規模再大啲時，各樣嘢都會再做好啲，咁樣會係一個 positive cycle…… 當然講就容易做就難，但依個我信係要繼續做落去嘅出路。