#163 關於創業（5）（20/07/2025）

有時我自己工作上好多位，係都幾令人頭痛。

我發現我自己每隔可能幾個月，就會咁樣 kick 住有時自己一個喺度唔開心諗唔掂咁樣 —— 其實有時依啲唔開心係來自於可能係無特別原因，即使其實無事無幹，我會 tend to 諗嘢會諗到最壞最差情況，自己去先行預備咗先，但當係咁時有時真係會令自己唔開心成個人謝哂。

今日又係一日咁嘅日子，不如寫下「關於創業」。

當隔一段時間又咁樣自己嚟一次，喺度咁不斷懷疑自己，覺得自己能力不足，其實我都係一個普通人，咁樣下下懷疑自己係會總有一日頂唔順，但依啲問題係好難解決，係要自己去識得自我排解。

喺唔同場合我認識唔少比我大，多數30-40幾歲嘅叔叔，佢哋都係可能我年紀二十幾時候創業做自己生意到依家，當然每個人做嘅行業同埋自己工作上嘅階段都唔同，但確實有唔少真係去到可能好後期講緊40幾先喺自己事業上有「起色」，係比佢哋同齡朋友係遲，但佢哋都繼續做緊同埋無放棄。所以有時我都真心好佩服。因為當感覺自己一生喺度「追落後」時，其實心入面無人會覺得好受。我唔知道佢哋有無也曾經好迷失、患得患失咁，但至少佢哋都未放棄（比較大機會其實更多人已經放棄咗，不過嗰啲我認識唔到）。

創業其中一個困難係你開頭嘅路通常會易啲順啲，但行到咁上下就吖….. 無路。就好似你一個人去行山，明明開頭有哂石屎路有石級，雖然條路係就係窄啲，但都係有路，行落都無乜嘢㗎，你仲喺度自己哼歌添，行行下到咁上下啲石屎路慢慢漸變成泥路，泥路又越嚟越窄同唔多見到，雜草叢生，行下行下，漸漸連條路都睇唔到，前面係一堆樹林。

樂觀啲你可以話四處都係路，就等你去做第一個去行，悲觀啲你可以話係無路。

回去已經唔係選項因為後面嘅路都已經係睇唔到，四處都係樹，你已經行得太耐行得太深，搵唔返剛才行入嚟嘅路。

然後你仲要感覺自己比人差，要「追落後」。

真係唔易。